काठमाडौँबाट डिजेल लिन भारत हिँडेको ट्याङ्करबाट २१८ किलो गाँजा बरामद

काठमाडौँ , जेठ १३ । काठमाडौँबाट डिजेल लिन भारत हिँडेको ट्याङ्करबाट प्रहरीले २१८ किलो गाँजा बरामद गरेको छ

बाराको जितपुर–सिमरा उपमहानगरपालिका १ बाट ना४ख २९७९ नम्बरको ट्यांकरबाट गाँजा बरामद गरिएको जिल्ला प्रहरी कार्यालय बाराले जनाएको छ ।

जिल्ला प्रहरी कार्यालय बाराका प्रमुख प्रहरी उपरीक्षक दीपेन्द्र शाहीका अनुसार प्रहरीले बुधबार दिउँसो १ बजे पथलैयाको एक ग्यारेजबाट ट्यांकरसहित चालक र सहचालकलाई पक्राउ गरेको हो।

पक्राउ पर्नेमा ट्यांकरका चालक महोत्तरी बर्दिवास नगरपालिका–८ का ३३ वर्षीय घनश्याम गिरी र सह(चालक चितवन खैरहनी नगरपालिका–२ का राजकुमार दवाडी छन् ।

एसपी शाहीका अनुसार ट्यांकर पथलैया चोकमा रहेको एउटा ग्यारेजमा रोकेर राखिएको थियो । सोही क्रममा प्लाष्टिकको पोकामा राखिएको गाँजा बरामद गरिएको हो ।