काठमाडौंबाट प्रहरीद्वारा पेस्तोलसहित ३ जना पक्राउ

काठमाडौं , कात्तिक २१ । प्रहरीले काठमाडौंबाट पेस्तोलसहित ३ जनालाई पक्राउ गरेको छ ।
उनीहरुलाई प्रहरीले काठमाडौंको चोभारबाट एउटा पेस्तोल र त्यसमा लाग्ने ५ राउण्ड गोलीसहित पक्राउ गरेको हो ।

पक्राउ पर्नेमा मनोज बस्नेत, देवेन्द्र भण्डारी र सुमन खड्का छन् । महानगरीय अपराध अनुसन्धान महाशाखाका प्रमुख एसएसपी सहकुलबहादुर थापाले उनीहरुलाई पक्राउ गरेको पुष्टि गरे ।
बा १७ च ८३६४ नम्बरको गाडी चेकजाँच गर्ने क्रममा हतियारसहित उनीहरुलाई पक्राउ गरिएको प्रहरीले जनाएको छ ।

थापाले पक्राउ परेकामाथि विस्तृत अनुसन्धान भइरहेको बताउँदै तीनै जनामाथि हातहतियार तथा खरखजना ऐन अन्तरगत कारबाही प्रक्रिया अघि बढाइने बताए ।