नक्कली सुन देखाई ठगी गर्ने २ जना पक्राउ

काठमाडौं, कात्तिक २० । साँखुबाट प्रहरीले नक्कली सुन देखाई ठगी गर्ने २ जनालाई पक्राउ गरेको छ । नक्कली सुन देखाई ठगी गर्ने दुई जनालाई प्रहरीले मङ्गलबार साझँ बेँसीगाउँबाट पक्राउ गरेको हो ।

बिक्री वितरणका लागि नक्कली सुन देखाई हिँडिरहेका भन्ने सूचनाका आधारमा महानगरीय प्रहरी कार्यालय बौद्धले उनीहरुलाई पक्राउ गरेको हो ।

पक्राउ पर्नेमा दोलखा गौरीशङ्कर गाउँपालिकाका २३ वर्षीय मीनबहादुर तामाङ र सोही ठाउँका २० वर्षीय पेम्बा तामाङ रहेका छन् ।

पछिल्लो समय ‘फाइन गोल्ड वान केजी’ लेखिएको सुनजस्तो देखिने पहेँलो धातु बोकेर बिक्री वितरणका लागि ठगी गर्ने व्यक्ति हिँडिरहेका प्रहरीले जनाएको छ ।

पक्राउ परेका उनीहरुलाई आज म्याद थप गरी अनुसन्धान प्रक्रिया अगाडि बढाइने बौद्धका प्रहरी निरीक्षक माधव चौधरीले बताए ।