सार्वजनिक स्थानमा अशान्ति मच्चाउने १६ जना पक्राउ

काठमाडौं, भदौ १९ । सार्वजनिक स्थानमा अशान्ति मच्चाउने १६ जनालाई प्रहरीले पक्राउ गरेको छ ।
पर्वतमा सार्वजनिक स्थानमा अशान्ति मच्चाउने १६ जनालाई पक्राउ गरिएको हो । सार्वजनिक स्थानमा झै–झगडा तथा कुटपिट गरी अशान्ति मच्चाउने कार्यमा संलग्न रहेको अभियोगमा उनीहरुलाई कुश्मा नगरपालिका–५ यान्त्रिक चोकबाट पक्राउ गरिएको हो ।

सार्वजनिक स्थानमा दुई समूहका युवाहरुबीच एकआपसमा झगडा तथा कुटपिट भइरहेको र स्थानीय व्यक्तिहरु आतङ्कित भई अशान्ति भइरहेको भन्ने खबर प्राप्त भएपछि जिल्ला प्रहरी कार्यालय पर्वतबाट खटिएको प्रहरीले उनीहरुलाई पक्राउ गरेको हो ।

घटनामा संलग्नमध्ये घाइते भएका २ जनालाई उपचारको लागि पर्वत जिल्ला अस्पतालमा लगिएकोमा सामान्य उपचार पश्चात दुवै जना डिस्चार्ज भएका छन् ।

पक्राउ परेकाहरुलाई सार्वजनिक शान्ति विरुद्दको कसुर अन्तर्गत मुद्दा दर्ता गरी थप अनुसन्धान भइरहेको जिल्ला प्रहरी कार्यालय पर्वतले जनाएको छ ।