स्याङ्जाबाट हतियार र विस्फोटक पदार्थसहित २ जना पक्राउ
काठमाडौं, साउन २४ । स्याङ्जाबाट हतियार र विस्फोटक पदार्थसहित २ जना पक्राउ परेका छन् ।
जिल्ला प्रहरी कार्यालय स्याङ्जाले हतियार र प्रतिबन्धित सामग्रीसहित दुई जनालाई पक्राउ गरेको हो ।
पक्राउ पर्नेमा भीरकोट नगरपालिका–९, का शिव दर्लामी र मोहन सिंजाली रहेको प्रहरीले जनाएको छ । उनीहरुबाट एक थान एअरगन, बम जस्तो देखिने ‘आईडी’ ५ थान, चन्दा उठाउने रसिद प्याड र विप्लव समूहका विभिन्न दस्तावेजहरु बरामद गरेको प्रहरीले जनाएको छ ।
उनीहरुको साथबाट प्रतिबन्धित विप्लव नेतृत्वको नेपाल कम्युनिष्ट पार्टीको दस्तावेज फेला परेपछि छानबिन गर्दा हतियारसमेत फेला परेको जिल्ला प्रहरी कार्यालय स्याङ्जाका प्रमुख राजकुमार लम्सालले जानकारी दिए ।
गल्याङ नगरपालिकामा शंकास्पद गतिविधिमा गरेको आशंका प्रहरीले उनीहरुलाई पक्राउ गरेको हो ।
अनुसन्धानका क्रममा दर्लामीको दुईतले गोठ तथा धन्सारबाट लुकाइ राखेको हतियार बरामद गरेको प्रहरीले जनाएको छ ।
उनीहरुबाट विभिन्न व्याक्तिलाई धम्काएर ५० लाख चन्दा मागेको १८ थान लेटर प्याडसमेत फेला परेको प्रहरी प्रमुख लम्सालले जानकारी दिए ।
विप्लव समूहका दस्तावेज फेला परेको भन्दै प्रहरीले उनीहरुलाई विप्लव समूहकै कार्यकर्ता भएको अनुमान गरेको छ ।
प्रतिक्रिया दिनुहोस्