नेपाल–भारत जोड्ने महाकाली नदीमाथिको झोलुङ्गे पुल सञ्चालनमा आयो

काठमाडौं, साउन १८ । निर्माण सम्पन्न भएको आठ महिनापछि महाकाली नदीमाथि बनेको लाली र भारत पिथौरागढको डड्या जोड्ने पुलको औपचारिक रूपमा उद्घाटन भएको छ । नेपाल सरकारको तुइन तथा ट्युब विस्थापन कार्यक्रमअन्तर्गत निर्माण भएको झोलुङ्गे पुलको औपचारिक रूपमा शुक्रबार उद्घाटन भएको हो ।

लेकम गाउँपालिका–३ लालीस्थित निर्माण भएको झोलुङ्गे पुलको नेपाल र भारतका अधिकारीहरूले संयुक्त रूपमा उद्घाटन गरेका हुन् । नेपालका तर्फबाट जिल्ला समन्वय समिति प्रमुख करवीरबहादुर कार्की, प्रमुख जिल्ला अधिकारी शङ्करबहादुर विष्ट, लेकम गाउँपालिकाका अध्यक्ष प्रमानन्द जोशी, भारत पिथौरागढका विधायक विशनसिह चुफाल, जिल्ला अधिकारी विजयकुमार जोगदण्डेलगायत दुवै देशका सुरक्षा अधिकारीको सहभागिता थियो ।

भारतको उत्तराखण्ड सरकारले पिथौरागढ जिल्लाका मजिस्ट्रेट कार्यालयले गत सोमबार पत्र लेखेर लाली पुल सञ्चालनका लागि अनुमति दिएको थियो । भारतको उत्तराखण्ड सरकारका उपसचिव रणजित सिंहले पिथौरागढका मजिस्टे«टलाई चिठी लेखेर भारतको गृहमन्त्रालय र उत्तराखण्डको गृह मन्त्रालयले पुल सञ्चालन गर्न कुनै आपत्ति नभएको जानकारी गराउँदै पुल सञ्चालन गर्न अनुमति दिएपछि औपचारिक रूपमा पुलको उद्घाटन गरिएको बताइएको छ ।

पहिलो पटक प्रधानमन्त्री हुँदा केपी शर्मा ओलीले देशभरका तुइन विस्थापन गर्ने घोषणा गरेका थिए । सोही कार्यक्रमअन्तर्गत लालीमा ट्युब विस्थापन गर्दै झोलुङ्गे पुल निर्माण गरिएको हो । नेपाल सरकारको रु एक करोड ३२ लाख लगानीमा उक्त पुल गत पुस २ गते निर्माण सम्पन्न भएको थियो ।

“पुल सञ्चालन भएपछि जोखिमपूर्ण ट्युबको यात्रा अन्त्य भएको छ”, पुलको उद्घाटन गर्दै जिल्ला समन्वय समिति प्रमुख कार्कीले भने, “अब महाकाली बढ्दा कष्टकर ट्युबको यात्रा सधैँलाई अन्त्य भएको छ ।” नेपाल र भारतका स्थानीयको दैनिक आवतजावतको रूपमा रहेको ट्युब यात्रा अन्त्यको घोषणाले स्थानीयमा आठ महिनापछि खुशी छाएको छ ।

पुल उद्घाटनका लागि पुगेका अधिकारीहरूलाई गाउँपालिका र स्थानीयले भव्य स्वागत गरेका थिए । पुल सञ्चालनमा आएपछि लाली क्षेत्रका नागरिक मात्रै नभएर लेकम गाउँपालिका–१ का सर्मोली र बिनखाली, वडा नम्बर २ का कुणी र गाणागाउँ, ३ का लाली, मकन्ना, ऐरपाली, गुमाखोली र किम्तड, वडा नं ४ का बुडाकोट, खरकडा, पाथी र टकना, वडा नम्बर ५ का रिठाचौपाता, मैखोली, सिरोडा तथा वडा नं ६ का तेनीगाउँ, उचाकोट, मालिकार्जुन गाउँपालिका वडा नम्बर ७ बाँकु, वडा नम्बर ६ डाडाकोट र वडा नम्बर ४ हुनैनाथका नागरिक ट्युबको जोखिमबाट मुक्त भएका छन् ।

यस्तै भारतको पिथौगढका जिल्ला अधिकारी जोगदण्डेले पुल सञ्चालनपछि सीमा क्षेत्रका दुवै देशका नागरिकलाई सहज भएको बताए । लेकम गाउँपालिकाका अध्यक्ष प्रमानन्द जोशीले सिङ्गो लेकमका स्थानीयका लागि पुल सञ्चालनले खुशी बढेको बताए । “पुल बन्छ भनेर हल्ला मात्रै सुनेका थियौँ”, लालीका स्थानीय शेरसिंह विष्टले भने, “अब जोखिम यात्रा टुङ्गिएको छ, पुल बने पनि यस क्षेत्रमा भन्सार कार्यालयसमेत आवश्यक छ ।”रासस