इन्जिनियर र सव इन्जिनियर घुस रकमसहित परे रंगेहात पक्राउ

काठमाडौं, असार ३ ।प्रहरीले इन्जिनियर र सव इन्जिनियरलाई घुस रकमसहित रंगेहात पक्राउ गरेको छ ।

भोजपुरको हतुवागढी गाउँपालिकामा कार्यरत इन्जिनियर मिसुहाङ्ग किराँत र सव–इन्जिनियर नइन्द्र पारोहाङ्ग राईलाई ७० हजार घुस सहित रंगेहात पक्राउ गरिएको हो ।

इन्जिनियर मिसुहाङ्ग किराँतलाई ५० हजार र सवइन्जिनियर नइन्द्र पारोहाङ्ग राईलाई २० हजार सहित रंगेहात पक्राउ परेका हुन् ।

बाटो मर्मतको बिल भुक्तानी दिने प्रयोजनको लागि सेवाग्राहीसँग घुस मागेको सूचनाका आधारमा अख्तियार दुरुपयोग अनुसन्धान आयोग इटहरीबाट गएको टोलीले दुई जनालाई पक्राउ गरेको अख्तीयार दुरूपयोग अनुसन्धान आयोगका प्रवक्ता प्रदिपकुमार कोइरालाले जानकारी दिएका छन् ।