उदयपुरमा फेला पर्यो बेवारिसे अवस्थामा राखिएको ९ राउण्ड गोली

फाइल तस्बिर

काठमाडौं, असार ३ । उदयपुरमा बेवारिसे अवस्थामा राखिएको ९ राउण्ड गोली फेला परेको छ ।

उदयपुरको त्रियुगा नगरपालिका वडा नं. ६ को खोला टोलमा ९ राउण्ड गोली फेला परेको हो ।

बेवारिसे अवस्थामा सोमबार राति पेस्तोलको गोली ७ राउण्ड र एसएलआरको गोली २ राउण्ड भेटिएको इलाका प्रहरी कार्यालय बेल्टारले जानकारी दिएको छ ।

खेतमा बालबालिका खेलिरहेको अवस्थामा गोली भेटिएपछि प्रहरीलाई खबर आएको इलाका प्रहरी कार्यालयका प्रहरी निरीक्षक गंगा पौडेलले जानकारी दिए ।

पौडेलका अनुसार, गोलीमा खिया लागिसकेको छ । माटोमा शंकास्पद बस्तु रहेको खबर प्राप्त हुनेबित्तिकै इलाका प्रहरी कार्यालय बेल्टारको टोली गई बरामद गरेको हो ।

गोली कसले किन के प्रयोजनका लागि राखेको हो भन्नेबारे अनुसन्धान भइरहेको प्रहरी निरीक्षक पौडेलले बताए ।