धारिलो हतियार प्रहार गरी जेठाजुले गरे बुहारीको हत्या,जीपले ठक्कर दिँदा सडक छेउमै खेलिरहेका एक बालकको ज्यान गयो

काठमाडौं, बैशाख २६ । ललितपुरको चापागाउँमा जेठाजुले धारिलो हतियार प्रहार गरी बुहारीको हत्या गरेका छन् ।

ढोलाहिटीका ३५ वर्षीय उज्ज्वल महतले २५ वर्षीया अन्जना लामा महतलाई खुकुरी प्रहारी गरी हत्या गरेका महानगरीय प्रहरी वृत्त चापागाउँले जनाएको छ ।

हत्यामा संलग्न महतलाई पक्राउ गरी घटनाका बारेमा थप अनुसन्धान भइरहेको पनि प्रहरीले जनाएको छ ।
उता बैतडीमा जीपले ठक्कर दिँदा एक बालकको ज्यान गएको छ । डिलाशैनी गाउँपालिका(६ बांगाबगरमा जीपले ठक्कर दिँदा एक तीन वर्षीय बालक युकेश साउदको ज्यान गएको हो । सडक छेउमै खेलिरहेका बालकलाई बिहीबार दिउँसो गोकुलेश्वरबाट सतबाँझतर्फ आउँदै गरेको से १ ज ६०३ नम्बरको जीपले ठक्कर दिएको हो ।
जीपको ठक्करबाट गम्भीर घाइते भएका उनको उपचारको क्रममा गोकुलेश्वर अस्पतालमा ज्यान गएको जिल्ला प्रहरी कार्यालयका प्रवक्ता एवं प्रहरी निरीक्षक दीपक पातलीले जानकारी दिए ।
बालकलाई ठक्कर दिएर भाग्दै गरेका जीप चालक विक्रम बिष्टलाई सल्सेनाबाट जीपसहित नियन्त्रणमा लिइएको प्रहरी निरीक्षक पातलीले जानकारी दिए ।

स्थानीयहरुले दोषीमाथि कडा कारबाहीको माग गर्दै अहिले महाकाली राजमार्गको सतबाँझ गोकुलेश्वर सडकखण्ड अन्तर्गत बांगाबगरमा सडक अवरुद्ध गरेका छन् ।