विप्लवका मकवानपुर इन्चार्ज ज्वाला पक्राउ

काठमाडौं, चैत २८ । नेत्रविक्रम चन्द विप्लव नेतृत्वको नेकपाका मकवानपुर इन्चार्ज बीरबहादुर घलान ‘ज्वाला’ पक्राउ परेका छन् ।

हेटौडा उपमहानगरपालिका ८ नम्बर वडाको फारलाइनबाट ज्वाला र सहयोगी बीरबहादुर मुक्तान पक्राउ परेको जिल्ला प्रहरी कार्यालय मकवानपुरले जनाएको छ । उनीहरु अहिले प्रहरी हिरासतमा छन् ।

मकवानपुरको मनहरी गाउँपालिका ७ निर्मलबस्ती घर भएका ज्वाला तत्कालीन माओवादी जनमुक्ति सेनाका कमान्डर हुन् । भिडन्तमा गोली लागेपछि उपचार गर्न भारत जाँदा अस्पतालबाटै भारतीय प्रहरीले पक्राउ गरी लामो समय जेल हालेको थियो ।

संविधानसभा निर्वाचनताका २०६४ मा ज्वाला रिहा भएका थिए । यो भन्दा पहिले ज्वाला वैैद्य माओवादीतर्फ रहेका बताइन्छ ।