सुर्खेत गाडी दुर्घटनामा ३ को मृत्यु, २४ भन्दा बढी घाइते

काठमाडौं, २३ कार्तिक। सुर्खेतमा भएको गाडी दुर्घटनामा तीन जनाको मृत्यु भएको छ। शुक्रबार दिउँसो सवा दुई बजे दैलेखबाट सुर्खेत आउँदै गरेको कर्णाली प्रदेश ०२००१ ख ९९८ नम्बरको गाडी सुर्खेत र दैलेखको सीमानामा दुर्घटनामा परेको हो।

उक्त दुर्घटनामा मृत्यु भएकाहरूको पहिचान खुलिनसकेको जिल्ला प्रहरी कार्यालय सुर्खेतका प्रवक्ता डिएसपी वीरेन्द्रवीर विश्वकर्माले जानकारी दिए। उनका अनुसार उनीहरूको घटनास्थलमै मृत्यु भएको हो।

दुर्घटनामा २४ जना भन्दा बढी घाइते छन्। घाइतेहरूलाई उपचारका लागि कर्णाली प्रदेश अस्पतालमा लगिएको डिएसपी विश्वकर्माले बताए।

गाडी सडकबाट तल खसेको थियो। गाडीमा कति सवार थिए र कसरी दुर्घटना भयो भन्ने खुल्न बाँकी छ।