मन्दिरमा बलि दिन भन्दै सल्यानमा मामाले गरे ८ वर्षीय भाञ्जाको घाँटी काटेर हत्या !

सल्यान, माघ २  | देवदेवीलाई बलि दिँदा देवदेवीहरू खुशी हुन्छन् र आफूले चिताइएका इच्छा, आकाङ्क्षाहरू सबै पुरा हुन्छन् भन्ने मनोविश्वास मानिसमा रहेको पाइन्छ । तर मानव बली! अहिले मानव बली सुन्दा पनि भयानक लाग्छ। यो त केही सय वर्षपहिले हुन्थ्यो।

तर सल्यानमा यस्तै भयानक घटना भएको छ। यहाँ एक जना मामाले आफ्नै सहोदर भान्जाको बली दिएका छन्। मन्दिरभित्र भान्जाको घाँटी काटेर टाउको छिनाई रगत चढाएको पाइएको छ।

खुर्पाले रेटेर हत्या गरिएको पुजनको टाउको र शरीर लगभग छुट्टिएको छ । छालाको भागले टाउको अड्याएको अवस्थामा शव भेटिएको इन्स्पेक्टर श्रेष्ठले जानकारी दिए । स्थानीयले देउता आएको भनेर डम्बर काम्ने गरेको र मन्दिरमा भाञ्जाको बली दिएको प्रहरीलाई बताएका छन् ।

घटना भएलगत्तै पुरीका अन्दाजी सात वर्षीय छोराले थाहा पाएको र उनले नै स्थानीयलाई खबर गरेको जिल्ला प्रहरी कार्यालय सल्यानका सूचना अधिकारी प्रहरी निरीक्षक गोपाल श्रेष्ठले बताए।

‘भान्जालाई काटिसकेपछि मन्दिरभित्रै शव गाड्दै गर्दा उसकै छोराले देखेछन्। छोराले गाउँलेलाई खबर गरेपछि नियन्त्रणमा लिएर हामीलाई खबर गरिएको हो’ श्रेष्ठले भने ।

घटनालगत्तै स्थानीयले पुरीलाई बाँधेर प्रहरीलाई खबर गरेका थिए। सूचना पाएलगत्तै प्रहरी चौकी बनगाड, इलाका प्रहरी कार्यालय देवस्थल र जिल्ला प्रहरी कार्यालयबाट खटिएको टोलीले पुरीलाई नियन्त्रणमा लिएको थियो।

प्रारम्भिक बयानमा पुरीले आफूलाई देउता लागेको र देउताको मनोकामना पूरा गर्न बली दिएको बताएका छन्। करिब दुई वर्षदेखि आफ्नो शरीरमा देउता चढेको भन्दै उनी काम्दै आएका थिए। गाउँलेले भने मानसिक सन्तुलन ठीक नभएको बताएको श्रेष्ठले जानकारी दिए।

शरीरमा देउता काम्न थालेको भन्न थालेदेखि पुरी आफ्नो सानो छोराको साथमा परिवारदेखि अलग भएर बस्दै आएका थिए।

आइतबार राति मात्र उनलाई जिल्लामा पुर्‍याइएकाले अनुसन्धानका लागि म्याद थप गर्ने तयारी भइरहेको श्रेष्ठले जानकारी दिए।