राप्रपा केन्द्रीय समितिको बैठक माघ १७ गते, यी विषयमा हुनेछ छलफल

काठमाडौं , माघ २ । राष्ट्रिय प्रजातन्त्र पार्टी (राप्रपा) केन्द्रीय कार्य समितिको पूर्ण बैठक आगामी माघ १७ गतेदेखि बस्ने भएको छ । बैठक काठमाडौंमा बस्ने सो पार्टीले जनाएको छ । बैठकमा समसामयिक राजनीतिक परिस्थितिको समीक्षा, पार्टीको भावी कार्यनीति र कार्यक्रम तय गरिने बताएको छ ।

साथै आगामी जेठ महिनामा हुने पार्टीको केन्द्रीय महाधिवेशनको तयारी सम्बन्धमा घनिभूत छलफल हुने पनि पार्टी कार्यालयले जारी गरेको विज्ञप्तिमा जनाएको छ ।

प्रत्येक तीन महिनामा बस्ने केन्द्रीय समितिको बैठकमा अध्यक्ष कमल थापाले समसामयिक राजनीतिक प्रतिवेदन प्रस्तुत गर्ने पनि विज्ञप्तिमा उल्लेख छ ।