कार्यभार सम्हाल्दै मन्त्री भट्टले भने- उद्योगलाई एक नम्बरको मन्त्रालय बनाउँछु
काठमाडौं मंसिर ५ । नवनियुक्त उद्योग वाणिज्य तथा आपूर्तिमन्त्री लेखराज भट्टले एक नम्बरको मन्त्रालय बनाउने उद्घोष गरेका छन् । बिहीबार मन्त्रालयमा कार्यभार सम्हाल्दै उनले यस्तो उद्धोष गरेका हुन् ।
दीर्घकालीन योजना पूरा गर्दै उद्योगलाई एक नम्बरको मन्त्रालय बनाउने उनले दाबि गरे । उनले पुरानो ढर्राले नभई समाजवाद उन्मुख कार्ययोजना बनाएर अघि बढ्नुपर्नेमा जोड दिए ।
उनले भने, ‘समाजवाद उन्मुख कार्य योजना बनाएर अघि बढ्नुपर्छ । पुरानो ढर्राले अघि बढ्न सकिन्न ।’
सिक्ने र सिकाउने गरेर मन्त्रालय एक ढिक्का भएर अघि बढ्ने बताउँदै उनले कार्यसम्पादनको क्रममा सेवाग्राही अलमल नपरुन् भनेर कर्मचारीहरुलाई सचेत समेत गराए ।
दोस्रोपटक उद्योग मन्त्रालयको जिम्मेवारी पाएका उनले भने, ‘अहिलेसम्म मन्त्रालयले पहिल्याएको समस्या समाधान गर्दै अघि बढ्नुपर्छ । सेवाग्राही अलमलमा नपर्ने गरी कार्यसम्पादन होस् । यो मन्त्रालयमा अनुशासनहीन काम नहोस् ।’
कैलाली घर भएका भट्ट डा. बाबुराम भट्टराई नेतृत्वको मन्त्रिपरिषदमा वाणिज्य तथा आपूर्तिमन्त्री थिए । त्यसअघि प्रचण्ड पहिलो पटक प्रधानमन्त्री हुँदा उनी श्रम मन्त्री बनेका थिए भने अहिले आएर फेरि उद्योग वाणिज्य तथा आपूर्तिमन्त्री बनेका छन् ।
प्रतिक्रिया दिनुहोस्