मानव बेचविखन तथा ओसारपसार हुन नदिन सरकार सचेत छः गृहमन्त्री थापा

काठमाडौं, भदौ २० । गृहमन्त्री रामबहादुर थापाले मानव बेचविखन तथा ओसारपसारजस्ता जघन्य अपराधका घटना हुन नदिन सरकार सचेत रहेको बताएका छन् ।

यसका लागि सरकारले कानुनी, नीतिगत र संरचनागत प्रयास गरिरहेको उनले दावी गरेका छन्।

गृहमन्त्री थापाले नेपालको संविधानले सबै प्रकारका शोषणविरुद्धको हकलाई मौलिक हकको रुपमा व्यवस्था गरेर, मानव बेचबिखन तथा ओसारपसार नियन्त्रणका लागि कानुन निर्माण गरेर, महिला हिंसाविरुद्ध हुने सबै प्रकारका अपराध नियन्त्रणका लागि प्रहरीलगायतका राज्यका सबै निकायलाई परिचालन गरेर मानव बेचविखन तथा ओसारपसार हुन नदिने काम गरिरहेको पनि बताए।

मानव बेचविखन तथा ओसारपसार विरुद्धको १३ औं राष्ट्रिय दिवसको अवसर पारेर शुक्रबार काठमाडौंमा आयोजित एक कार्यक्रममा बोल्दै उनले मानव बेचविखन बढ्दै गएकोमा चिन्ता व्यक्त गर्दै यसको नियन्त्रणका लागि सरकारले गम्भिरतापूर्वक काम गरिरहेको पनि बताए।

यसैबिच कार्यक्रममा बोल्दै महिला, बालबालिका तथा ज्येष्ठ नागरिकमन्त्री थममाया थापाले मानव बेचविखन तथा ओसारपसार विश्वमै बढदै गएको समस्या भएकाले यसलाई नियन्त्रण गर्न सशक्त र प्रभावकारी कदम चाल्न सरकार प्रतिवद्ध रहेको बताए।

उनले गरिवी र अशिक्षाका कारण पनि मानव बेचविखनको समस्या बढदै गएको उल्लेख गर्दै ती समस्या समाधानका लागिसमाधानका लागि पनि सरोकारवाला सबैको साथ र सहयोगको आवश्यक्तामा पनि जोड दिए।

मन्त्री थापाले सरकारले मानव बेचबिखन तथा ओसारपसार नियन्त्रणको कामलाई प्रभावकारी बनाउने गरी यस विरुद्धको अभियानलाई राष्ट्रिय दिवसकै रुपमा मनाउने गरिएको पनि स्पष्ट पारे। तर सरकार मानव बेचविखन तथा ओसारपसारमा सचेत भएपनि सयौँ चेलीहरु बेचविखनको चपेटोमा पर्ने गरेका छन् ।

मानव बेचविखन तथा ओसारपसारजस्ता जघन्य अपराधका घटनामा कमी भने आउन सकेको छैनन् । यस्ता घटना थुर्पै घटेका छन् ।

मानव बेचविखन बढ्दै गएकोमा चिन्ता व्यक्त गर्न थालेका छन् । यसको नियन्त्रणका लागि सरकारले गम्भिरतापूर्वक काम गरिरहेको भएपनि नियन्त्रण भने अझै हुन सकेको छैन् ।