कर्मचारी भर्ना प्रकरणः बदनियतपूर्ण विज्ञापन निकाल्ने लोकसेवा आयोगका पदाधिकारीलाई कारवाही गर्नुपर्छः अध्यक्ष साह

काठमाडौँ, १८ जेष्ठ । नेपाल कम्युनिष्ट पार्टी (नेकपा) प्रदेश नम्बर २ का अध्यक्ष प्रभु साहले संवैधानिक व्यवस्था विपरीत कर्मचारी भर्नाका लागि विज्ञापन निकालेको लोकसेवा आयोगका पदाधिकारीलाई कारवाही गर्नुपर्ने बताउनु भएको छ ।

आयोगले जेठ १५ गते स्थानीय तहमा कर्मचारी भर्नाका लागि विज्ञापन निकालेको थियो । उक्त विज्ञापन संविधानको मर्म विपरीत समानुपातिक समावेशी नभएको भन्दै अध्यक्ष साहले शुक्रवार प्रेस विज्ञप्ति जारी गरि आपत्ती जनाउनु भएको हो । जनताको लामो संघर्ष, त्याग र बलिदानबाट प्राप्त प्रतिफलको रुपमा रहेको समानुपातिक समावेशी प्रतिनिधित्वको अधिकार हनन हुने गरी गरिएको विज्ञापन बदनियतपूर्ण रहेको अध्यक्ष साहको आरोप छ ।

मुलुक स्थिरतातर्फ अघि बढिरहेको अवस्थामा महत्वपूर्ण संवैधानिक अंगको रुपमा रहेको आयोगले परिवर्तन उल्टाउने तथा मुलुकमा द्वन्द्व बढाउने केन्द्र र प्रदेशबीच दुरी बढाउने कदम चालेको भन्दै आयोगलाई त्यस्ता कुनै पनि कार्य सह्य नहुने उहाँको दाबी चेतावनी दिनुभएको छ । मुलुकको आवश्यकता र वर्तमान परिस्थिति बिर्सेर आयोगले चालेको यस्तो कदम फिर्ता लिई विज्ञापन रोक्न माग उहाँले माग गर्नुभएको छ ।