कांग्रेस पदाधिकारी बैठक बस्दै

काठमाडौं, १९ कार्तिक । प्रमुख प्रतिपक्षी दल नेपाली कांग्रेसले पछिल्लो राजनीतिक घटनाक्रमबारे पार्टीको धारणा तय गर्न पदाधिकारीहरूको अनौपचारिक बैठक बोलाएको छ। पार्टी केन्द्रीय कार्यालय सानेपामा बिहीबार दिउँसो ३ बजे बैठक बस्न लागेको हो।

सरकारका पछिल्ला निर्णय, प्रहरी नेतृत्व परिवर्तन, पार्टीको वैधानिकतामाथि उठाइएको प्रश्न तथा प्रेस र न्यायपालिकाको स्वतन्त्रतासँग जोडिएका विषय बैठकका प्रमुख एजेन्डा रहने नेताहरूले बताएका छन्।

सरकारले दानबहादुर कार्कीलाई प्रहरी महानिरीक्षक (आईजीपी) पदबाट हटाएर मनोज कार्कीलाई नियुक्त गरेको विषयले राजनीतिक वृत्तमा चर्चा पाइरहेका बेला कांग्रेसले यसबारे पार्टीको आधिकारिक धारणा निर्माण गर्ने तयारी गरेको छ।

त्यस्तै, हालै सार्वजनिक भएको इनम सापकोटासँग सम्बन्धित अडियो प्रकरण पनि बैठकमा छलफलको विषय बन्ने देखिएको छ। उक्त अडियोमा पार्टी सभापति गगन थापाले पार्टीलाई वैधानिकता दिलाउन १८ करोड रुपैयाँ खर्च गरेको प्रसंग उल्लेख भएको बताइएको छ।

कांग्रेसले भने उक्त प्रकरणलाई सरकारको नियोजित षड्यन्त्रको संज्ञा दिँदै आएको छ। निराधार, कपोलकल्पित र नियोजित आरोपमार्फत पार्टीको वैधानिकतामाथि प्रश्न उठाउने प्रयास भइरहेको कांग्रेसको बुझाइ छ।

सरकारले प्रतिपक्षी दलको आवाज दबाउन खोजेको आरोप लगाउँदै आएको कांग्रेसले न्यायपालिकाको स्वतन्त्रता र प्रेस स्वतन्त्रतामाथि भइरहेको भनिएको हस्तक्षेपविरुद्ध राजनीतिक तथा कानुनी प्रतिवाद गर्ने बताउँदै आएको छ।

पत्रकारहरूमाथिको धरपकडलगायत सरकारका पछिल्ला विवादित गतिविधिको छानबिनका लागि संसदीय छानबिन समिति गठन गर्नुपर्ने माग पनि कांग्रेसले अघि सारेको छ। यसका लागि प्रतिनिधिसभाको बैठक यथाशीघ्र बोलाउनुपर्ने उसको माग छ।

सरकारसँगको बढ्दो राजनीतिक टकराव, पार्टीको वैधानिकतासम्बन्धी विवाद र संगठनात्मक चुनौतीका बीच बस्न लागेको कांग्रेस पदाधिकारीको यो बैठकलाई राजनीतिक वृत्तमा चासोका साथ हेरिएको छ। बैठकबाट सरकारका पछिल्ला गतिविधिबारे कांग्रेसको आगामी रणनीति र संगठनात्मक कार्यदिशाबारे थप स्पष्ट धारणा आउने अपेक्षा गरिएको छ।