मकवानपुरमा ट्रकमा आगजनी, बुद्ध चोकमा बम, सेनाद्वारा बम डिस्पोज

मकवानपुर, १३ जेठ । मकवानपुरमा ट्रकमा आगजनी गरिएको छ । विप्लव नेतृत्वको नेकपाका कार्यकर्ताले बन्दको अवज्ञा गरेको भन्दै सोमबार बिहान हेटौँडाको चौकीटोलमा एउटा गाडीमा आगजनी गरेका छन् ।

जिल्ला प्रहरी कार्यालय मकवानपुरका प्रहरी नायब उपरीक्षक यज्ञप्रसाद भटराईले त्रिभुवन राजपथ अन्तर्गत हेटौँडाको चौकी टोलमा प्रहरी चौकी नजिकै ना ७ ख ९४९३ नम्बरको मिनी ट्रकमा आगजनी गरेको र आगजनीका कारण गाडी पूर्णरुपमा जलेको बताए ।
त्यस्तै हेटौँडाको बुद्धचोक नजिक आज बिहान प्रेसर कुकर बम फेला परेको थियो । बम राखेको थाहा पाउनासाथ प्रहरीले नेपाली सेनालाई खबर गरेर बिहान ५ बजेतिर बम डिस्पोज गरिएको प्रहरी नायव उपरीक्षक भट्टराईले जानकारी दिए ।