प्रधानमन्त्रीले संसदमा प्रयोग गरेको भाषाप्रति कांग्रेसको आपत्ति

काठमाडौं, बैशाख २४ । प्रमुख प्रतिपक्षी दल नेपाली कांग्रेसले संसदमा प्रधानमन्त्री केपी शर्मा ओलीले सांसदको जवाफ फर्काउने क्रममा प्रयोग गरेको भाषाप्रति आपत्ति जनाएको छ।
कांग्रेस संसदीय दलले विज्ञप्ति जारी गर्दै प्रधानमन्त्रीले प्रयोग गरेको भाषाप्रति आपत्ति जनाएको हो।

सरकारको वार्षिक नीति तथा कार्यक्रममाथि छलफल पश्चात प्रतिनिधिसभा सदस्यहरूले सोधेको प्रश्नको जवाफ दिने क्रममा प्रधानमन्त्री ओलीले क्रोस, कुन्ठा र निम्छरो अभिव्यक्तिहरुलाई वास्ता नगरेर प्रश्नहरुको जवाफ दिन्छु भनेका थिए।

बैठकको रोष्टमबाट संसदको गरिमा घटाउने, अमर्या्दित र गैरसंसदीय भाषा बोलेको भन्दै कांग्रेस संसीय दल गम्भीर आपत्ति जनाएको हो।

यस्तै,सभामुख कृष्णबहादुर महराले यस्ता शब्दहरु संसदको रेकर्डबाट तुरुन्त हटाउनुपर्नेमा नहटाइएको र संसदको गरिमाको रक्षाका लागि निर्णायक भूमिका निर्वाह नगरेको आरोप लगाएको छ।

‘संसदको गरिमामा आँच आउने खालमा यस्ता अभिलेखलाई संसदको रेकर्डबाट यथाशिघ्र हटाउन र गरिमामय ढंगले संसद सञ्चालन गर्नका लागि नेपाली कांग्रेस संसदीय दल जोडदार माग गर्दछ’, संसदीय दलका प्रमुख सचेतक बालकृष्ण खाणद्वारा जारी विज्ञप्तिमा भनिएको छ ।