मुख्यमन्त्री गुरुङले भने -एजेण्डाविहीन विप्लव समूहको आन्दोलनको कुनै अर्थ छैन
काठमाडौं, चैत १२ । एजेण्डाविहीन विप्लव समूहको आन्दोलनको कुनै अर्थ नभएको गण्डकी प्रदेशका मुख्यमन्त्री पृथ्वी सुब्बा गुरुङले बताएका छन् ।
उनले विप्लव नेतृत्वको नेकपाको आन्दोलन एजेण्डाविहीन रहेको भन्दै त्यस्ता आन्दोलनको कुनै अर्थ नरहेको बताएका हुन् ।
मंगलबार बिहान पर्वत सदरमुकाम कुश्माबजारमा आयोजित कार्यकर्ता भेटघाट कार्यक्रममा मुख्यमन्त्री गुरुङले मुलुकको विकास निर्माणमा अवरोध पुर्याउने र राज्यको सम्पत्तिमा क्षति पुर्याउने काममात्रै विप्लव समूहले गरेको आरोप लगाए । यस्ता अराजक गतिविधि त्यागेर वार्तामा आउन पनि उनले आह्वान समेत गरे । अब पहिलेकोजस्तो क्रान्ति सम्भव नभएको बताउँदै उनले सो समूहलाई सरकारसँग वार्तामा आएर शान्तिपूर्ण बाटो रोज्न आग्रह गरे ।
अब मुलुकमा हिंसात्मक गतिविधि गर्ने जोसुकै समूहलाई नागरिकले स्वतः प्रतिकार गर्ने उनको भनाइ थियो । स्थायी सरकारले मुलुकलाई स्थायित्व दिन लागेका बेला बम पड्काउने गतिविधि नगर्न आग्रह गर्दै उनले विप्लवको पार्टीलाई नभई उसका गैरकानूनी गतिविधिलाई सरकारले प्रतिवन्ध लगाएको प्रष्ट पारे ।
सिके राउतलाई मुल धारमा ल्याउने विषयमा पार्टी भित्रैबाट असन्तुष्टि देखिएको बताउँदै मुख्यमन्त्री गुरुङले सुरुमै आलोचना गर्नुभन्दा पनि त्यसले पार्ने दुरगामी असरलाई पर्खिनुपर्ने बताए । अहिले सिके राउतका गतिधिले सहमति सही हो या गलत हो भन्ने पुष्टि गरिसकेको उनको भनाइ छ ।
मुख्यमन्त्री गुरुङले प्रदेश सरकारले यो एक वर्षमा विकास निर्माणका आधार तयार गरेको बताउँदै अब प्रदेशको आर्थिक समृद्धिका लागि धमाधम काम गरिने जनाए । चौतर्फी समस्याका कारण एक वर्षमा नागरिकले अपेक्षा गरेअनुसारको काम गर्न नसकेको स्वीकार गर्दैै उनले अब द्रुत विकासको मोडेलमा अघि बढ्ने बताए ।
नेकपा गण्डकी प्रदेशका इन्चार्जसमेत रहेका मुख्यमन्त्री गुरुङले चैत महिनाभित्रै पार्टीका सवै तहको एकता टुंगिने बताए ।
एकताका सवैजसो प्रकृया पुरा भइसकेको बताउँदै निर्णय गर्नमात्र बाँकी रहेको बताए । नेकपाका अध्यक्ष पुष्पकमल दाहाल स्वदेश फर्किएपछि एकता टुंगिने उनको भनाइ छ ।
प्रतिक्रिया दिनुहोस्