नेपाली काँग्रेसको बैंठक बस्दै, बैंठक विधान अनुमोदन र नेविसंघ विवादमा केन्द्रीत हुने

काठमाडौं, २८ माघ । केन्द्रीय पदाधिकारी र सदस्य महाधिवेशन प्रतिनिधि स्वतः बन्न पाउने कि नपाउने भन्ने विवाद झेल्दै आएको नेपाली काँग्रेसकोे केन्द्रीय कार्यसमिति बैठक सोमबार बस्दै छ ।

नेविसंघको म्याद थपको विवाद, महासमितिबाट पारित भएका एजेण्डा, विधान अनुमोदन लगायतका विषयमा आजको बैंठक केन्द्रीत हुने पार्टी स्रोतले जनाएको छ ।

तर, आज बस्ने बैठकले पुरानै व्यवस्थालाई कायम राख्दै विधान अनुमोदन गर्ने तयारी भइरहेको एक केन्द्रीय सदस्यले बताए । ‘सभापति नै आफ्नो प्रतिवद्धता उल्ट्याउन खोज्दै हुनुहुन्छ । यसले राम्रो पद्धतिको विकास गर्दैन’ केन्द्रीय सदस्य चन्द्र भण्डारीले भने, ‘यस्तो पराजित मानसिकता त्याग्नुपर्छ आरक्षण पनि एक पटकमात्रै दिनुपर्छ ।’

तर, देउवा निकट सहमहामन्त्री डा. प्रकाशशरण महतले बैठकमा छलफल गरेर जे निश्कर्ष आउँछ त्यही निर्णय सार्वजनिक गर्ने बताए । ‘धारणा राख्न समय मागिएमा त्यस विषयमा छलफल होला, नत्र आजै बैठक सकिन्छ । नेविसंघको पनि छिनोफानो हुन्छ र विधान पनि अनुमोदन हुन्छ,’ डा। महतले रातोपाटीलाई बताए ।

उता नेविसंघका विषयमा पनि नेताहरुबीच फरक–फरक मत सार्वजनिक भएको छ । दुई पटक गरी पाँच महिना बढी समय थपिए पनि महाधिवेशन गर्न वर्तमान कार्यसमितिले नसकेपछि सभापति देउवा र वरिष्ठ नेता रामचन्द्र पौडेल समुह वर्तमान कार्यसमिति भङ्ग गर्ने पक्षमा उभिएको छ । तर सिटौला समुह भने त्यसको विपक्षमा रहँदै आएको छ । बैठक ११ बजेपछि पार्टी केन्द्रीय कार्यलयमा बस्दैछ ।

बुधवारबाट सुरु भएको बैठकमा यही विषयलाई लिएर केन्द्रीय सदस्यहरुबीच विवाद भएपछि लम्बिएको थियो ।

जिल्ला सभापतिहरुको माग बमोजिम महाधिवेशनका लागि तल्लो तहबाटै निर्वाचित हुनुपर्ने प्रावधान राख्ने प्रतिबद्धता सभापति देउवालगायतले जनाएपनि अहिले त्यसलाइृ उल्ट्याउन खोजेपछि काँग्रेसमा विवाद चर्कदै हो ।

महासमितिबाट पारित भएको विधान, संशोधनसहित अनुमोदन गर्न बोलाइएको केन्द्रीय समितिमा नेताहरुले आ–आफ्ना अडान नछाडेपछि विधान अनुमोदन गर्न काँग्रेसलाई सकस परेको छ । गत बुधबार र विहीबार बसेको बैठकमा पक्ष–विपक्षमा मत राखेका थिए ।