नेविसंघमा दोस्रो पटक थपिएको म्याद पनि सकियो, तदर्थ समिति बन्ने संभावना
Published On : 16 January, 2019 5:14 am
काठमाडौं, माघ २ । नेपाल विद्यार्थी संघ नेविसंघले पटक पटक समय थप्दासमेत महाधिवेशन गर्न नसक्दा आलोचनाको शिकार हुन पुगेको छ ।
पूर्वनिर्धारित समयमा महाधिवेशन गर्न नसकेपछि राजनीतिक निर्णयका आधारमा गत मंसिर २ गते दोस्रोपटक दुई महिनाका लागि म्याद थपिएको भए पनि नेतृत्वको असफलताले सिंगो नेविसंघ नै ध्वस्त हुने स्थितिमा पुगेको
छ ।
दिइएको कार्यकाल बुधबार सकिएपछि अब माउ पार्टी नेपाली काँग्रेसले तदर्थ समिति बनाउने सम्भावना बढेको छ ।
विधानमा एक पटकमात्र तीन महिना म्याद थप्न सकिने व्यवस्था भए अनुसार सो समय दिइए पनि उक्त समयभित्र अधिवेशन गर्न नसकेपछि विधान भन्दा बाहिरबाट राजनीतिक निर्णय भन्दै काँग्रेस सभापति शेरबहादुर देउवाले दुई महिना समय थपेका थिए ।
उक्त समयमा चुनाव हुनै नसक्ने भन्दै तत्कालीन अवस्थामै महामन्त्री कुन्दन काफ्ले समूहले अध्यक्षलाई टिका लगाउन समय थपिएको भन्दै आलोचना गरेका थिए । उनले तत्कालीन समयमा आफ्नो टिमले राजीनामा दिने भनिरहेकै अवस्थामा उनको अस्वस्थ्यताका कारणले निर्णय टरेको थियो ।
थपिएको समयभित्र १४ जिल्लामा मात्र अधिवेशन भएको थियो । अन्य जिल्ला संगसंगै क्याम्पसहरुमा अधिवेशन हुन सकेको छैन ।
प्रतिक्रिया दिनुहोस्