मन्त्री लम्सालको ‘खुट्टा भाँच्नू’ निर्देशनपछि विवाद, सामाजिक सञ्जालमा तीव्र आलोचना
बाठमाडौं १, असार । पूर्वाधार विकास मन्त्री सुनिल लम्साल नागढुंगा–मुग्लिन सडक योजनाको निरीक्षणका क्रममा ठेकेदारलाई लक्षित गर्दै दिएको विवादास्पद अभिव्यक्तिका कारण आलोचनामा परेका छन्।
आइतबार धादिङस्थित सडक खण्डको निरीक्षण गर्दै मन्त्री लम्सालले बिजुलीको पोल सार्न ढिलाइ गरेको भन्दै सम्बन्धित ठेकेदारको ‘खोजी गरेर ल्याउनू’ र काम नगरे ‘खुट्टा भाँचिदिनू’ भन्ने अभिव्यक्ति दिएका थिए।
उनको भनाइको भिडियो सामाजिक सञ्जालमा सार्वजनिक भएपछि व्यापक आलोचना भइरहेको छ। निरीक्षणका क्रममा मन्त्रालयका सचिव, प्रमुख जिल्ला अधिकारी र प्रहरी प्रमुखसमेत उपस्थित थिए।
धादिङकी प्रमुख जिल्ला अधिकारी लक्ष्मी पाण्डेयले मन्त्रीको निर्देशनलाई काम छिटो गर्न दबाब दिने उद्देश्यको रूपमा व्याख्या गरेकी छन्। उनका अनुसार उनले ढिलाइ नगरी काम अघि बढाउन मात्र आग्रह गरेका थिए।
नागढुंगा–मुग्लिन सडक योजना पश्चिम खण्डकी आयोजना प्रमुखले भने सडक विभाग र नेपाल विद्युत प्राधिकरणबीच तीन वर्षअघि नै पोल सार्ने सम्झौता भए पनि कार्यान्वयन हुन नसकेको बताएकी छन्। उनका अनुसार पश्चिम खण्डमा १०७ र पूर्वी खण्डमा ८० भन्दा बढी विद्युत पोल अझै सार्न बाँकी छन्।
यसैबीच, मन्त्री लम्साल यसअघि पनि निर्माण व्यवसायीसँग सम्बन्धित विवादमा तानिएका थिए। उनले केही निर्माण व्यवसायीलाई नियन्त्रणमा लिन प्रहरी परिचालन गरेको घटनासमेत सार्वजनिक भएको थियो।
प्रधानमन्त्रीले समेत निर्माण ढिलाइप्रति कडा अभिव्यक्ति दिँदै कडा कदम आवश्यक भएको बताएका विगतका अभिव्यक्तिसमेत पुनः चर्चामा आएका छन्।
मन्त्रीको पछिल्लो अभिव्यक्तिपछि निर्माण क्षेत्र, प्रशासन र राजनीतिक वृत्तमा बहस चुलिएको छ।
प्रतिक्रिया दिनुहोस्