पर्सा जिल्ला अदालतले मेयर राजेशमान सिंहलाई धरौटीमा छाड्ने आदेश
जेष्ठ, १९ काठमाडौं । पर्सा जिल्ला अदालतले वीरगञ्ज महानगरपालिकाका मेयर राजेशमान सिंहलाई दुईवटा मुद्दामा धरौटीमा छाड्न आदेश दिएको छ।
अदालतले झुटा विवरण पेश गरी नागरिकता बनाएको मुद्दामा १५ हजार रुपैयाँ र लिखत सम्बन्धी मुद्दामा ४ लाख रुपैयाँ धरौटी तोकेको छ। सिंहले अहिले धरौटी बुझाउने प्रक्रिया गरिरहेका छन्।
सिंहविरुद्ध जेठ ८ गते पक्राउ पुर्जी जारी भएको थियो। उनलाई सोमबार बिहान पर्साको ठोरीबाट प्रहरीले पक्राउ गरी अदालतमा पेश गरेको थियो।
लिखत सम्बन्धी मुद्दामा सिंहसहित सिन्धुपाल्चोककी रिता भट्टराई र वीरगञ्ज–महानगरपालिका वडा नम्बर ३ का तत्कालीन पञ्जिकाधिकारी भिखारी रायविरुद्ध पनि पक्राउ पुर्जी जारी गरिएको थियो।
मामलामा आरोप छ कि सिंहले भट्टराईकी छोरी रुविना श्रेष्ठलाई आफ्नो छोरी बनाउने फर्जी जन्मदर्ता गरी नागरिकता र राहदानी बनाएका थिए। अर्का व्यक्तिलाई पनि आफ्नो छोरी भनेर जन्मदर्ता गरी विदेश पठाएको आरोप लगाइएको छ।
मुलुकी अपराध संहिता २०७४ अनुसार सरकारी वा सार्वजनिक लिखत कसुर गर्ने व्यक्तिलाई सात वर्षसम्म कैद र ७० हजार रुपैयाँसम्म जरिवाना हुने प्रावधान छ।
प्रतिक्रिया दिनुहोस्