उखु अभावले लुम्बिनी प्रदेशका चिनी मिलहरूले सिजनमा पनि लक्ष्यअनुसार क्रसिङ गर्न असमर्थ

काठमाडौं, १७ जेठ । लुम्बिनी प्रदेशका चिनी मिलहरूले यो सिजनमा पनि उखु अभावका कारण लक्ष्यअनुसार क्रसिङ गर्न सकेनन् । पुसदेखि चैतसम्म उखु क्रसिङको सिजन हो । यो सिजनका लागि चिनी मिलहरूले उखु क्रसिङको लक्ष्य निर्धारण गरेका थिए । तर कुनै पनि चिनी मिलले लक्ष्य अनुसार उखु क्रसिङ गर्न नसकेका हुन् ।

नवलपरासीमा मात्र ३ वटा चिनी मिल छन् । ती मिलले चाहेजति उखु नपाउँदा क्षमता अनुसार सञ्चालन नभएको लुम्बिनी चिनी कारखानाका महाप्रबन्धक केशव आचार्यले बताए ।

लुम्बिनी चिनी मिलले यो सिजनमा ८ लाख क्विन्टल उखु क्रसिङ गर्ने लक्ष्य राखेकोमा ७ लाख क्विन्टल मात्रै क्रसिङ गरेको छ । बागमती खाँडसारी चिनी मिलले १२ लाख क्विन्टल उखु क्रसिङको लक्ष्य रहे पनि १० लाख ८० हजार क्विन्टलमात्र क्रसिङ गरेको छ ।

यस्तै ईन्द्रा सुगर मिलले ८ लाख क्विन्टल क्रसिङ लक्ष्य राखेकोमा करिब ६ लाख क्विन्टलमात्र क्रसिङ गरेको छ । मिलहरूले उखु अभावका कारण क्रसिङको लक्ष्य पूरा गर्न नसकेको ईन्द्रा सुगरमिलका व्यवस्थापक गोपाल सापकोटाले बताए ।

सिजनमा चौबिसै घण्टासम्म चलाउन सकिने मिलहरू यो सिजनमा उखु अभावकै कारण दैनिक ६र८ घण्टामात्रै चलाएर बन्द गरिएको छ । लुम्बिनी प्रदेशमा रहेका १२ जिल्लामध्ये उखु उत्पादन गरेर चिनी मिललाई बिक्री गर्ने किसान नवलपरासी र कपिलवस्तु जिल्लामा मात्रै छन् ।

नवलपरासी जिल्लामा रहेका मिलहरूले कपिलवस्तुबाट केही उखु ल्याउने गर्दछन् । नवलपरासी जिल्लाको सुस्ता, प्रतापपुर, पालिनन्द, सरावल गाउँपालिका लगायत क्षेत्रमा उखु उत्पादन हुने गर्छ ।

यस्तै कपिलवस्तु जिल्लाको कृष्णनगर, विजयनगर, महाराजगन्ज र विजयनगरमा उखु उत्पादन हुन्छ । नवलपरासी, कपिलवस्तु जिल्लामा उखु उत्पादन घट्दै गएको छ ।

किसानहरूले समयमा पैसा नपाएका कारणले उखुको सट्टामा केरा खेती गर्न थालेका छन् । अर्कोतिर उखु उत्पादन भए पनि सबै उखु चिनी मिलहरूमा जाँदैन । चिनी मिलबाट भुक्तानी पाउन लामो समय कुर्नुपर्ने भएकाले कतिपयले भेली (सखर) बनाउने क्रसरमा बेच्ने गरेका छन् ।

जिल्ला कृषि ज्ञान केन्द्र कपिलवस्तुका प्रमुख भास्कर पौडेलले कपिलवस्तुको कृष्णनगर क्षेत्रको केही उखु चिनी मिलमा जाने गरे पनि धेरैजसो उखु भेली उद्योगमा खपत हुने बताए ।