आईएमईले गर्यो कोरोनाबाट विदेशमा ज्यान गुमाएका परिवारलाई ५० हजार सहयोग

काठमाडौं , पुस ३ । आईएमई ग्रुपले विदेशमा कोरोनाबाट ज्यान गुमाएका मृतकका परिवारलाई ‘आईएमई भरोसा कोष’ को रकम वितरण गरेको छ ।

शुक्रबार काठमाडौंमा आईएमई ग्रुपका अध्यक्ष समेत रहेका उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकाल र ग्रुपका प्रबन्ध निर्देशक हेमराज ढकालले संयुक्त रूपमा रकम वितरण गरेका हुन् । कामदारको रुपमा विदेश पुगेका मृतकका परिवार मध्ये काठमाडौंमा उपलब्ध सात परिवारलाई ‘आईएमई भरोसा कोष’ को रकम हस्तान्तरण गरिएको छ ।

कोरोनाको कारण साउदी अरबमा मृत्यु भएका ५, बहराइन र कतारमा मृत्यु भएका एक–एक जनाको परिवारले शुक्रबार प्रतिपरिवार ५० हजार रुपैयाँ सहयोग रकम पाएका छन् ।

महासंघका वरिष्ठ उपाध्यक्ष ढकालले चेक हस्तान्तरण गरे । चेक हस्तान्तरण गर्दै ढकाले श्रमका लागि विदेश पुगेर उतै मृत्युवरण गरेका कामदारका परिवारको पीडालाई थोरै भएपनि कम गर्न कोषले पहल गरेको बताए ।

साथै आगामी पुष मसान्त भित्र सबै परिवारलाई सहयोग रकम हस्तान्तरण गरिने आइएमई ग्रुपले बताएको छ । आइएमईले २०७६ साल पुष १६ देखि २०७७ असोज ३० गते सम्म कोरोनको कारण बिदेशमा मृत्यु भएका परिवारलाई आवेदन दिन आह्वान गरेको थियो । यस अवधिमा कुल ८१ वटा आवेदन परेको थियो ।