राष्ट्र बैंकले ल्यायो २६ अर्बको नयाँ नोट बजारमा

Nepalese banknotes 1000 Rupees. The issuance of the currency is controlled by the Nepal Rastra Bank, the central bank of Nepal.

काठमाडौं, साउन ७ । नेपाल राष्ट्र बैंकले २६ अर्ब रुपैयाँ बराबरको एक हजार रुपैयाँको नयाँ नोट आज (बुधबार) देखि बजारमा पठाएको छ । राष्ट्र बैंकका कार्यकारी निर्देशक रेवती नेपालका अनुसार नोटमा केही नयाँ विशेषता रहेका छन् ।

बजारमा पठाइएका नयाँ नोटमा सुरक्षा विशेषताहरु यथावत रहे पनि हात्तीको संख्या थपिएको छ । नयाँ नोटमा चितवनमा देवकलीबाट जन्मिएका जुम्ल्याहा हात्ती ‘राम लक्ष्मण’ को चित्र राखिएको छ ।

यसअघि एउटा मात्र हात्तीको चित्र अंकित भए पनि त्यो हात्री नेपालकै थियो वा अरु देशको भन्ने प्रष्ट थिएन । अब भने एक हजारको नोटको पृष्ठ भागमा आफ्नै देशका दुई जुम्ल्याहा राम–लक्ष्मणले छापिँदै मान्छेका खल्ती खल्तीमा बस्ने मौका पाएका हुन् ।

उक्त नोट तत्कालीन गभर्नर डा। चिरञ्जीवी नेपालकै पालामा छापिएको पनि राष्ट्र बैंकले जनाएको छ ।

नोटको अग्रभागमा नोटको नम्बर, सगरमाथाको चित्र र गभर्नरको दस्तखत रहेको छ । नेपाल राष्ट्र बैंकको अंग्रेजी संक्षिप्त रुप एनआरबीको केही अंश नोटको अग्रभागमा र उक्त एनआरबीको बाँकी अंश नोटको पृष्ठ भागमा एकै पटक प्रिन्ट गरिएको जनाइएको छ ।