प्रदेश–३ को नाम ‘वाग्मती’ र राजधानी हेटौंडा , संयुक्त प्रस्ताव भयो दर्ता
काठमाडौं, पुस २६ । प्रदेश नम्बर–३ को नाम राख्ने विषयले निकै चार्चा र विवाद पायो, सरकारले गरेको निर्णयमा कसैले सहमति जनाए भने कतिपयले असहमति जनाएर बिरुद्ध समेत गरे ।
यसका लागि पटक पटक बैठक समेत बस्यो , यसैबीच शनिबार प्रदेशसभा सचिवालयमा प्रदेश–३ को नाम ‘वाग्मती’ र राजधानी हेटौंडा राख्न सत्तापक्ष र प्रतिपक्ष दल सहमत भएका छन् । शनिबार प्रदेशसभा सचिवालयमा उनीहरुले संयुक्त प्रस्ताव दर्ता गराएका छन् ।
प्रस्तावको पक्षमा प्रदेश–३ का मुख्यमन्त्री एवं नेकपा संसदीय दलका नेता डोरमणि पौडेल रहेका छन् ।प्रस्तावको समर्थकमा प्रतिपक्ष दल नेपाली कांग्रेस संसदीय दलका नेता इन्द्र बानियाँ, राप्रपाकी रीता माझी र राप्रपा संयुक्तकी रीना गुरुङ छन् । दुईजना सांसद रहेको नेपाल मजदुर किसान पार्टी भने यसमा मौन रहेको छ ।
यता , प्रदेश–३ को राजधानी काभ्रे हुनुपर्छ भन्ने प्रस्तावको प्रस्तावकमा विवेकशील साझा पार्टीका रमेश पौडेल रहेका छन् । समर्थकमा सोही दलका प्रदेशसभा सदस्य विराज भट्ट श्रेष्ठ र शोभा शाक्य छन् ।
प्रदेशको नामाकरण र राजधानीका सम्बन्धमा प्रदेशसभा सचिवालयमा दुईओटा प्रस्ताव दर्ता गरिएका हुन् ।शनिबारको प्रदेशसभा बैठकमा ती प्रस्तावका सम्बन्धमा छलफल हुने र आइतबारको बैठकले नाम र राजधानी टुंगो लगाउने प्रदेशसभाका सभामुख सानुकुमार श्रेष्ठले जानकारी दिए ।
यसअघि, शुक्रबार बसेको प्रदेश–३ नेकपा संसदीय दलको बैठकले प्रदेशको नाम वाग्मती र राजधानी हेटौंडामा राख्नुपर्ने प्रस्ताव पारित गरेको थियो ।
प्रतिक्रिया दिनुहोस्