कञ्चनपुरमा हात्तीको आक्रमणबाट दुई महिलाको मृत्यु, ४ घाइते

काठमाडौं, मंसिर २५ । कञ्चपुरमा जंगली हात्तीको आक्रमणबाट दुई महिलाको मृत्यु भएको छ। जिल्लाको महाकाली नगरपालिका– २ स्थित मायापुरी सामुदायिक वनमा घाँस काट्ने क्रममा बुधवार बिहान जंगली हात्तीको बथानले आक्रमण गर्दा उनीहरुको मृत्यु भएको हो।

मृत्यु हुनेमा महाकाली नगरपालिका–२ की बसन्ती भट्ट र सोही ठाउँकी भुलीदेवी बोहरा रहेको ईलाका प्रहरी कार्यालय दोधरा चाँदनीका प्रहरी निरिक्षक चेतराज पनेरुले बताए।

हात्तीको आक्रमणबाट ४ जना घाइते भएका छन्। घाइते हुनेमा सुनिता विष्ट, सरिता ओझा, ललिता बोहरा र उमा साउँद रहेका छन्। घाइतेमध्ये विष्ट र ओझाको अवस्था गम्भीर रहेको जनाइएको छ।

घाइतेलाई उपचारका लागि भारतको खटी अस्पताल लागिएको प्रहरी निरिक्षक पनेरुले बताए।