डाक्टर नआएको भन्दै अस्पताल तोडफोड, एक जना पक्राउ

काठमाडौं, असोज २८ । सप्तरीको एक अस्पतालमा डाक्टर नआएको भन्दै तोडफोड गरिएको छ । बिरामी जाँचका लागि अस्पतालमा डाक्टर नआएको भन्दै बिरामीका आफन्तले राजविराजमा रहेको गजेन्द्रनारायण सिंह अस्पतालमा तोडफोड गरेका छन् ।

तोडफोड र प्रदर्शनका कारण सोमबार अस्पताल तनावग्रस्त बनेको थियो ।

डा.ज्ञानेन्द्र कुमार झा र डा.प्रनेश कुमार यादव दिउँसो २ बजेसम्म पनि अस्पताल नआएपछि आक्रोशित बिरामीका आफन्तले चर्को नाराबाजी गर्दै तोडफोड गरेका हुन् । तोडफोडका कारण डा. झा र डा. यादवको बिरामी जाँच्ने कोठामा क्षति पुगेको अस्पताल प्रशासनले जनाएको छ ।

प्रहरीले तोडफोडमा संलग्न भएको आरोपमा राजविराज नगरपालिका– १ निवासी गुन्जन झालाई पक्राउ गरेको छ ।

यसैबीच अस्पताल प्रशासनले भने डा. झा बिदामा रहेको र डा. यादव यो समयमा इमर्जेन्सी कक्षमा एक बिरामीको उपचार गरिरहेको बताएका छन् ।

पछिल्लो पटक गजेन्द्र नारायण सिंह अस्पतालमा कार्यरत चिकित्सकहरु अस्पतालबाट तलब खाने काम गरेपनि अस्पताल भन्दा बढी आ–आफनो निजी क्लिनिकमा समय दिने गरेको बिरामीहरुको आरोप रहेको छ ।

सम्बन्धित निकायको लापर्वाहीका कारणले दिन प्रतिदिन यो अस्पताल रेफर सेन्टरको रुपमा परिचित बन्दै गएको छ ।