पछिल्लो समय एसिड आक्रमणका घटना बढ्दै, रोक्नका निमित्त कडा कानुनको माग

काठमाडौँ , भदौ २२ । पछिल्लो समय किशोरीमाथि एसिड आक्रमणका घटना बढ्दै गएका छन् । समय समय मा किशोरी एसिडको आक्रमक बन्ने गरेका छन् ।

संघीय संसदको प्रतिनिधिसभामा किशोरीमाथि एसिड आक्रमणका घटना बढ्दै गएको भन्दै कडा कदम चाल्न सरकारको ध्यानाकर्षण गराईएको छ।

प्रतिनिधिसभाको आइतबारको बैठकमा समय लिएर बोल्दै सांसद सांसद जुली कुमारी महतोले एसिड आक्रमणका घटना नियन्त्रण गरि महिलाको सुरक्षाका लागि कडा कानुन बनाउन सरकारको ध्यानाकर्षण गराइन् ।

भदौ २० गते शुक्रबार बिहान विद्यालय जादै गर्दा विरगञ्ज महानगरपालिका वडा नम्बर ३ छपकैयाकी १५ बर्षिया मुस्कान खातुनमाथि एसिड आक्रमण भएको थियो ।

उनको अहिले काठमाण्डौको कीर्तिपुर अस्पतालमा उपचार भइरहेको छ । सांसद महतोले महिलाको सुरक्षाका लागि थप संवेदनशील बन्दै दोषीलाई पक्राउ गरि कडा कारबाही गर्न पनि माग गरिन् ।

सांसद महतोले भनिन् “महिलाको सुरक्षाको लागि कडा कानुन ल्याउन आवश्यक छ । प्रदेश २ मा छोरीमाथि एसिड आक्रमणका घटना धेरै पटक भएकाले रोक्न कडा कदम चाल्नुपर्ने जरुरी छ । प्रदेश २ को सरकारले बेटी बढाउ बेटी जोगाउ अभियान जोडतोडले लागु गरेको छ । बेटी नै बाचेनन् भने पढाई वेटी जोगाउ अभियानको औचित्य हुने छैन ।”

त्यसैगरी बैठकको शून्य समयमा बोल्दै सांसदहरुले एसिड आक्रमणबाट घाइते भएकी मुस्कान खातुनको निशुल्क उपचारको व्यवस्था गरी दोषीलाई कडा कारवाही गर्न सरकारको ध्यानाकर्षण गराएका छन् ।

सांसद नरमाया ढकालले एसिड आक्रमणको घटनाको भत्र्सना गर्दै दोषिलाई नियन्त्रणमा लिई तत्काल कानुनी कारबाही गर्न माग गरिन् ।

सांसद पार्वता डिसी चौधरी मुस्कान खातुनको सम्पूर्ण उपचार खर्च व्यहोर्दै दोषीलाई कडा कारबाही गर्न सरकारको ध्यानाकर्षण गराइन् ।

सांसद पुष्पा कुमारी कर्ण कायस्थले कहिले सम्म बालिकाले असुरक्षित जीवन जीउन बाध्य हुने भन्दै कानुन संसोधन गरेर भएपनि एसिड आक्रमण गर्ने दोषीलाई मृत्यु दण्डको व्यवस्था गर्न माग गरिन् ।

सांसद पार्वती कुमारी विशुंखे, प्रमिला राई लगायत सांसदहरुले एसिड आक्रमणको घटनाको भत्र्सना गर्दै घटनाका दोषीलाई कडा कारबाही गर्दै भविश्यमा यस्ता घटना दोहोरिन नदिन सरकारको गम्भीर ध्यानाकर्षण गराएका थिए ।