विप्लव समूहका कास्की जिल्ला इन्चार्जसहित २ जना पक्राउ

काठमाडौं, भदौ ६ । प्रहरीले विप्लव समूहका कास्की जिल्ला इन्चार्जसहित २ जनालाई पक्राउ गरेको छ ।

नेत्रविक्रम चन्द ‘विप्लव’ समूहका जिल्ला इन्चार्ज रुपेश भनिने कृष्ण वाग्लेलाई प्रहरीले पक्राउ गरेको हो ।

सो समूहका जिल्ला इन्चार्जसहित दुई जनालाई पनि आज बिहान पोखरा महानगरपालिका–२७ शिसुवाबाट पक्राउ गरिएको जिल्ला प्रहरी कार्यालयका प्रमुख एवं प्रहरी उपरीक्षक दानबहादुर कार्कीले बताए ।

पक्राउ परेका अर्का एक जनाको परिचय खुल्न बाँकी भने रहेको प्रहरीको भनाइ छ । वाग्ले तनहुँबाट केही हप्ताअघि मात्र सो समूहको जिल्ला इन्चार्जको जिम्मेवारी लिएर यहाँ खटिएका बुझिएको छ ।

पक्राउ परेकाका बारेमा अनुसन्धान शुरु गरिएको प्रहरीले जनाएको छ । सो समूहका जिल्ला सेक्रेटरी सुजन विकसमेत गत महीना पक्राउ परिसकेका छन् ।