बझाङमा जिप दुर्घटना, ६ जनाको मृत्यु, ६ को अवस्था गम्भीर , अन्यको यस्तो छ

फाइल तस्बिर

काठमाडौं, असार २ । बझाङमा एक यात्रीवहाक जिप दुर्घटना हुँदा ६ जनाको मृत्यु भएको छ ।

सोमबार सदरमुकाम चैनपुरनजिकै रहेको डुङ्रीबाट मष्टा गाउँपालिकातिर जाँदै गरेको स१ज १०७२ नम्बरको जिप दुर्घटना भएको हो ।

मष्टा गाउँपालिका वडा नम्बर–१, डौठी भन्ने ठाउँमा जिप दुर्घटना भएको प्रहरीले जनाएको छ ।

दुर्घटनामा परी ६ जनाको मृत्यु भएको र ६ जना गम्भीर घाइते रहेको घटनास्थलमा खटिएका वडा प्रहरी कार्यालय चैनपुरका सइ महानन्द जोशीले इमेजखबरलाई बताए ।

उनकाअनुसार जिपमा कतिजना सवार थिए भन्ने खुलेको छैन । जिप भीरमा अड्किएको अवस्थामा छ । उद्धारकार्य जारी छ ।

जिप सडकबाट अफ्ठ्यारो ठाउँमा खसेको र मान्छेसमेत जान नसक्ने भएका कारण उद्धार गर्न निकै चुनौती रहेको सइ जोशीको भनाइ छ ।

घटनास्थलमा प्रमुख जिल्ला अधिकारी सुरेश सुनार, प्रहरी नायब उपरीक्षक सूर्यबहादुर केसीसहितको टोली गएको छ ।

मृत्यु हुनेमा तीन पुरुष, दुई महिला र एक बच्चा रहेका छन् । मृतकहरुको सनाखत भएको छैन । दुर्घटनाको कारण खुल्न सकेको छैन ।