प्रहरी चौकीमा विप्लवका कार्यकर्ताले आक्रमणको प्रयास गरेको कुरा सत्य होइन: गृह प्रवक्ता सुवेदी

काठमाण्डौ, ९ जेष्ठ । गृह मन्त्रालयका प्रवक्ता रामकृष्ण सुबेदीले सोलुखुम्बुको छेस्काम प्रहरी चौकीमा विप्लव समूहका कार्यकर्ताले आक्रमण प्रयास गरेको खबरमा सत्यता नभएको बताएका छन् ।

सोलुखुम्बुको छेस्काम प्रहरी चौकीमा विप्लव समूहका कार्यकर्ताले आक्रमण गरेको समाचार आएपछि त्यस भ्रमलाई चिर्दै प्रवक्ता सुवेदीले त्यस समाचारमा सत्यता नभएको प्रट्याए । उनले भने, ‘नियमित प्रक्रियाअनुसार सोलुखुम्बुबाट थप सुरक्षा सहायता माग भएकोले त्यो पठाएका हौँ, तर सञ्चार माध्ययममा आएको जस्तो चाहिँ होइन ।’

सोलुखुम्बुका प्रमुख जिल्ला अधिकारी नरेन्द्र रानामगरले महाकुलुङ गाउँपालिकाको विभिन्न क्षेत्रमा विप्लव समूहको गतिविधि बढेको सूचना भने पाएको स्वीकार गर्दै उनले भने, ‘गतिविधि बढेको सूचना पाएपछि त्यहाँ सुरक्षाका लागि थप प्रहरी पठाएको सत्य हो, त्यहाँ प्रहरी जनशक्ति कम भएकोले पठाएका हौँ, गतिविधि बढेको सूचनापछि सुरक्षा सतर्कता अपनाउनु सामान्य प्रक्रिया हो तर चौकी नै आक्रमणको प्रयास चाहिँ भएको छैन ।’

महाकुलुङ गाउँपालिकाका अध्यक्ष सागर किरातीले पनि केही दिन अघिदेखि गाउँमा नौला मानिसको गतिविधि बढेको र उनीहरुलाई सोधपुछसमेत भएको बताए । उनले भने, ‘उनीहरुले नाम्चेतर्फ आवतजावत गर्ने बताएको र केही ठाउँमा विप्लव कार्यकर्ताको पनि गतिविधि बढेकोले सतर्ककता अपनाइएको छ । तर आइतबार राति आक्रमणकै प्रयास भएको चाहिँ होइन ।’

विप्लव कार्यकर्ताको झण्डै ३० जनाको समूह आइतबार राति १२ बजेतिर हतियारसहित प्रहरी चौकीमा पुगेको र आक्रमणको सूचना पाएपछि प्रहरी पहिले नै सुरक्षित स्थानमा गएकोले घटना हुन नपाएको स्थानीय बासीन्दाले बताएका छन् । आज दिउँसो पनि त्यस क्षेत्रमा नेपाली सेनाको हेलिकप्टरले गस्ती गरेको स्थानीयको भनाइ छ ।

तर सोलुखुम्बुका प्रमुख जिल्ला अधिकारी रानामगर भने हेलिकप्टर घुम्नु सामान्य प्रक्रिया भएको बताउनुहुन्छ, ‘सोलुखुम्बुमा हेलिकप्टर घुम्नु नयाँ होइन, यहाँ बिरामी आवतजावात वा विभिन्न कामले हेलिकप्टर आउने जाने गर्छ ।’

बिहानैदेखि स्थानीयबासीन्दामा भने त्रास फैलिएको छ । ‘सशस्त्र र जनपदको गस्ती, सेनाको हेलिकप्टर घुम्नु, गाउँमा आएका विप्लव कार्यकर्ता सबैतिरबाट हामिले असुरक्षित महसुस गरेका छौँ’, एक स्थानीयले भने । अहिले महाकुलुङ गाउँपालिकामा चहलपहलसमेत कम भएको स्थानीय बासिन्दाको भनाइ छ । सरकारी पक्षले आक्रमण प्रयास भएको पुष्टि नगरे पनि गाउँमा गतिविधि बढेकोले आफूहरुलाई चिन्तित बनाएको उनीहरुको भनाइ छ । सुरक्षामाथी चुनौती थपिंदै गएको छ ।