बारा र पर्साका हावाहुरीपीडितका लागि आवास निर्माण सुरु, पुनःनिमार्णका लागि तीन हजार नेपाली सेना परिचालन
काठमाडौं, वैशाख २१ । नेपाली सेनाले बारा र पर्साका भीषण हावाहुरीपीडितहरुका लागि आवास निर्माण सुरु गरेको छ ।
संघीय सरकारका १० मन्त्रीसहित प्रदेश नम्बर–२ का मुख्यमन्त्रीले शनिबार बारा र पर्साका ११ ठाउँमा एकैसाथ घर निर्माणको शिलान्यास गरका छन् ।
सो हावाहुरीले सबैभन्दा धेरै क्षति पुर्याएको बाराको फेटा गाँउपालिकामा उपप्रधान एवं रक्षामन्त्री ईश्वर पोखरेलले घर निर्माणको शिलान्यास गरका हुन् ।
त्यसैगरी, उप्रधान एवं स्वास्थ्य तथा जनसंख्यामन्त्री उपेन्द्र यादव, गृहमन्त्री रामबहादुर थापालगायत अन्य मन्त्रीहरुले प्रभावित क्षेत्रहरुमा आवास निर्माणको शुभारम्भ गरे ।
सेनाले बारा र पर्साका हावाहुरीपीडितहरुका लागि १४ सय ५३ ओटा घर निर्माण गर्न लागेको छ ।
हावाहुरी प्रभावित क्षेत्रमा पुनःनिमार्णका लागि झन्डै तीन हजार नेपाली सेना परिचालन गरिएको छ । त्यसैगरी, ७५० जना इन्जिनियर पनि सरकारले खटाएको छ ।
सेनाले आगामी साउन १२ गतेभित्र सम्पूर्ण घरहरु निर्माण गरिसक्ने जनाएको छ ।
प्रतिघरको निर्माण लागत ५ लाख ४५ हजार रुपैयाँ लाग्ने अनुमान गरिएको छ ।
बाराको पुरैनियामा ‘जनता आवास बारारपर्सा निर्माण योजना शिलान्यास कार्यक्रम’मा रक्षामन्त्री ईश्वर पोखरेलले पीडितहरुको ऐलानी तथा पुर्जा्विहीन जग्गाहरु मिलाइ घर निर्माणलाई सहज बनाउन प्रदेश र स्थानीय सरकारलाई निर्देशन दिए ।
प्रदेश–२ का मुख्यमन्त्री लालबाबु राउतले आवास निर्माणमा नीतिगतदेखि हरेक प्रकारको सहयोग गर्न प्रदेश सरकार तत्पर रहेको बताए ।
गएको चैत १७ गते आएको भीषण हावाहुरीमा परेर बारा र पर्सामा २८ जनाको ज्यान जानुका साथै झन्डै दुई हजार बढी घरमा क्षति पुगेको थियो ।
जल तथा मौसम विज्ञान विभागले सो हावाहुरी ‘टोर्नाडो’ भएको पुष्टि गरेको थियो ।
प्रतिक्रिया दिनुहोस्