क्याम्ब्रिज विश्वविद्यालयको शीर्ष स्थानमा नेपालका ३ विद्यार्थी

काठमाडौं, ४ वैशाख । नेपालका तीन विद्यार्थी क्याम्ब्रिज इन्टरनेसनल परीक्षा ‘ए’ लेभलमा शीर्ष स्थानमा आउनुका साथै ५३ विद्यार्थीले उत्कृष्ट क्याम्ब्रिज लर्नर अवार्ड जितेका छन् ।
मल्पी इन्स्टिच्युटका साकृत कर्माचार्य, जेभियर इन्टनेसनल कलेजका रीतिक यादव र जेम्स इन्स्टिच्युट अफ हाइयर एजुकेसनकी प्रजिता बुढाथोकीले २०१८ को जुन र नोभेम्बरमा सञ्चालित क्याम्ब्रिज इन्टरनेसनल परीक्षामा अब्बल स्थान ल्याएका हुन् । यसैगरी, अन्य ५३ नेपाल विद्यार्थीले उत्कृष्ट क्याम्ब्रिज लर्नर अवार्ड हात पार्न सफल भएका छन् ।

हरेक वर्ष प्रदान गरिने अवार्डमा गत वर्ष भन्दा यसपालि नेपाली विद्यार्थीले विभिन्न विधामा गरी ४० प्रतिशत बढी सफलता प्राप्त गरेका हुन् ।

विश्वविद्यालयले उत्कृष्ट विद्यार्थीलाई गत २९ चैतमा सम्मान गरिएको हो । सम्मान कार्यक्रममा क्याम्ब्रिज इन्टरनेसनलका दक्षिण एसिया क्षेत्र हेर्ने क्षेत्रीय निर्देशक रुचिरा घोसले नेपाली विद्यार्थीको उत्कृष्ट प्रदर्शन देखेर आफु धेरै उत्साहित भएको बताइन् ।