काठमाडौं,२३ भदौ। एपीवान टेलिभिजनबाट प्रसारण भइरहेको चर्चित गायन रियालिटी शो नेपाल आइडलबाट काउली बुढी अर्थात् सन्ध्या बुढा बाहिरिएकी छन् । टप ट्वेन्टी अर्थात् पियानो राउन्डका लागि भएको प्रतिस्पर्धाका क्रममा उनी थिएटर राउन्डबाटै बाहिरिएकी हुन् ।
काठमाडौँमा भएको नेपाल आइडलको अडिसनका क्रममा ‘फूलको थुँगा बहेर गयो गंगाको पानीमा‘.’ गीत सुरिलो भाकाले गाउँदै जजहरुको मन जितेर अघि बढेकी उनको यात्रा थिएटर राउन्डमा टुंगिएको हो । नेपाल आइडलबाट बाहिरिए पनि उनले आफूलाई केबल पाँच मिनेटको समयले स्टार बनाइदिएको प्रतिक्रिया दिइन् ।
‘नेपाल आइडलले दिएको पाँच मिनेट समयले आज म यति चर्चित भएकी छु’, उनले भनिन्, ‘अब पहिलेबाटै चलिरहेको मेरो काउली बुडी शोलाई निरन्तरता दिन्छु, गायन त साथमा छँदैछ ।’
नेपाल आइडलको थिएटर राउन्ड सकिएसँगै अब पियानो राउन्डका लागि अन्तिम २० जना प्रतिस्पर्धी छनोट भएका छन् । नेपाल आइडल हाल एपीवान टेलिभिजनबाट हरेक बिहीबार र शुक्रबार राति साढे ८ बजेदेखि प्रसारण हुँदै आएको छ।
प्रतिक्रिया दिनुहोस्