नेप्से परिसूचक २० अंकको गिरावट, कारोबार पनि घट्यो
काठमाडौ, १९ असोज ।नेपाल स्टक एक्स्चेन्ज (नेप्से) परिसूचक सोमबार २० अंक घटेको छ ।
नेपाल धितोपत्र बोर्डले ५ प्रतिशतभन्दा धेरै सेयर भएका संस्थापक लगानीकर्ताले जानकारी गराएर मात्र सेयर बिक्री गर्न पाउने व्यवस्थाले नेप्से निरन्तर घट्दै आएको छ ।
नेप्से सूचकसँगै कारोबार रकममा पनि उल्लेख्य गिरावट आएको नेप्सेले जनाएको छ । सोमबार नेप्सेमा ३ अर्ब २७ करोड रुपैयाँ बराबर मात्रै सेयर कारोबार भएको छ । सोमबार कारोबार सुरु भएदेखि निरन्तर घटेको नेप्से सूचक बन्द हुँदासम्म कायम रह्यो ।
बोर्डको उक्त व्यवस्था उपर पुनर्विचार गर्न प्रतिनिधिसभा अन्तर्गत अर्थ समितिले पनि बोर्डलाई निर्देशन दिएको छ । तर, लगानीकर्ताको मनोबल फर्केको सोमबारको बजारले संकेत गर्दैन । साथै, लाभांशको सिजन भएकाले सेयर मूल्य समायोजनका कारण बजार सूचक नकारात्मक हुन योगदान गरेको छ ।
सोमबार नेप्सेमा ३२ कम्पनीको सेयर मूल्य बढेको छ । त्यसैगरी २ सय ४२ कम्पनीको सेयर मूल्य घटे पनि ४ कम्पनीको सेयर मूल्यमा कुनै परिवर्तन आएन । साथै, सोमबार नेप्सेमा कारोबार भएका अधिकांश समूहगत परिसूचक घटेका छन् ।
सोमबार बैंकिङ १०.७३, विकास बैंक २९.१६, वित्त २४.३६, होटल ७३.२८, जलविद्युत् ३६.९५, लगानी १.०१, जीवन बीमा ९३.८१, उत्पादनमूलक १०४.५१, लघुवित्त २७.२४, निर्जीवन बीमा ६०.९९ र अन्य समूह १६.६७ अंक घटेका छन् । तर, सोमबार व्यापार समूह भने १०.७१ अंक बढेको छ ।
सोमबार नेप्सेमा ३ सय ५९ कम्पनीको ४४ हजार ७ सय ७७ करोबारबाट ३ अर्ब २७ करोड रुपैयाँ बराबर ९० लाख कित्ता सेयर खरिद बिक्री भएको छ ।
यो कारोबार रकम गत साता अन्तिम कारोबार दिन शुक्रबारको तुलनामा थोरै हो । शुक्रबार नेप्सेमा ३ अर्ब ८९ करोड बराबर सेयर कारोबार भएको थियो ।
प्रतिक्रिया दिनुहोस्