वाणिज्य बैंकको आधार दर घट्दै, सस्तो ब्याजमा ऋण दिनेमा राष्ट्रिय वाणिज्य बैंक अगाडि
काठमाडौं, १५ साउन। वाणिज्य बैंकहरूको आधार दर लगातार घट्दै जाँदा कर्जाको ब्याजदर पनि ओरालो लागिरहेको छ। बैंकिङ प्रणालीमा अधिक तरलता रहे पनि आर्थिक गतिविधि सुस्त हुँदा कर्जाको माग न्यून रहेकाले बैंकहरूले निक्षेपको ब्याजदर र आधार दर दुवै घटाउँदै आएका छन्।
साउन महिनामा २० वटै वाणिज्य बैंकको औसत आधार दर घटेर ४.८९ प्रतिशतमा झरेको छ। असारमा औसत आधार दर ४.९७ प्रतिशत रहेको थियो। एक महिनाको अवधिमा औसत आधार दर ०.०९ प्रतिशत बिन्दुले घटेको हो।
हाल बैंकहरूले कर्जाको प्रकृतिअनुसार आधार दरमा थप १.५ प्रतिशतदेखि ५ प्रतिशतसम्म सेवा शुल्क जोडेर ऋण प्रवाह गर्दै आएका छन्। त्यसैले आधार दर कम भएका बैंकबाट ऋण लिँदा तुलनात्मक रूपमा कम ब्याज तिर्नुपर्ने हुन्छ।
साउन महिनाको विवरणअनुसार सबैभन्दा कम आधार दर राष्ट्रिय वाणिज्य बैंकको रहेको छ। बैंकको आधार दर ४.२७ प्रतिशत कायम भएको छ।
त्यसपछि स्ट्यान्डर्ड चार्टर्ड बैंकको आधार दर ४.२१ प्रतिशत, एभरेष्ट बैंकको ४.३८ प्रतिशत, नबिल बैंकको ४.४४ प्रतिशत, नेपाल बैंकको ४.५० प्रतिशत, नेपाल इन्भेस्टमेन्ट मेगा बैंकको ४.६४ प्रतिशत, ग्लोबल आइएमई बैंकको ४.७५ प्रतिशत, कृषि विकास बैंकको ४.७९ प्रतिशत र सानिमा बैंकको ४.९२ प्रतिशत रहेको छ।
बाँकी ११ वाणिज्य बैंकको आधार दर ५ प्रतिशतभन्दा माथि रहेको छ।
सबैभन्दा बढी आधार दर भएका बैंकमा एनआइसी एसिया बैंक र नेपाल एसबिआई बैंक रहेका छन्। यी दुई बैंकको आधार दर क्रमशः ५.९१ प्रतिशत र ५.२१ प्रतिशत रहेको छ। यस कारण यी बैंकबाट ऋण लिँदा तुलनात्मक रूपमा बढी ब्याज तिर्नुपर्ने अवस्था हुन सक्छ।
बैंकको आधार दर कर्जा छनोटको महत्वपूर्ण आधार भए पनि ऋणीले सेवा शुल्क, कर्जाको प्रकृति, भुक्तानी अवधि तथा अन्य सर्तसमेत अध्ययन गरेर मात्र निर्णय लिनुपर्ने विज्ञहरूको सुझाव छ।
प्रतिक्रिया दिनुहोस्