पहिलो विश्वकप गोलसंगै चम्किए यामल स्पेनको सहज जित

काठमााडौं, ८ असार ।  स्पेनले फिफा विश्वकप २०२६ मा साउदी अरबमाथि ४–० को प्रभावशाली जित दर्ता गर्दा युवा स्टार लमिन यामल आकर्षणको केन्द्र बने। अमेरिकाको एटलान्टामा भएको खेलमा यामलले आफ्नो करिअरको पहिलो विश्वकप गोल गर्दै स्पेनको जितमा महत्वपूर्ण योगदान दिए।

खेल सुरु हुनुअघि नै रंगशालामा उपस्थित दर्शकहरूले यामललाई उत्साहजनक स्वागत गरेका थिए। विशाल स्क्रिनमा उनको तस्बिर देखिएलगत्तै समर्थकहरूको हुटिङ र तालीले रंगशाला गुञ्जिएको थियो।

आफ्नो दोस्रो विश्वकप खेल तथा पहिलो सुरुआती रोजाइको खेलमा यामलले केवल ५९८ सेकेन्डमै गोल गर्दै इतिहास रचे। उक्त उपलब्धिसँगै उनी विश्वकपमा गोल गर्ने आठौँ कान्छो खेलाडी बनेका छन्।

खेलपछि भावुक देखिएका यामलले विश्वकपमा गोल गर्नु आफ्नो बाल्यकालदेखिको सपना रहेको बताए। “पहिलो स्टार्टमै गोल गर्न पाउनु अविश्वसनीय अनुभूति हो। केही वर्षअघि म विश्वकप स्कुलबाट हेर्दै थिएँ, आज त्यसै प्रतियोगितामा गोल गर्न सफल भएको छु,” उनले भने।

स्पेनका प्रशिक्षक लुइस डे ला फुएन्टेले यामलको प्रदर्शनको प्रशंसा गर्दै टोलीका खेलाडीहरू उच्च आत्मविश्वासका साथ खेलिरहेको बताए। उनले युवा खेलाडीलाई थप चोटको जोखिमबाट जोगाउन समयमै विश्राम दिएको पनि उल्लेख गरे।

मिडफिल्डर एलेक्स बाएनाले यामलको उपस्थितिले मात्रै पनि विपक्षी टोलीमाथि दबाब सिर्जना हुने बताए। उनका अनुसार यामल प्रशिक्षणदेखि खेलसम्म अत्यन्तै केन्द्रित र प्रभावशाली देखिएका छन्।

२१ जुन २०२६ यामलका लागि विशेष दिन बनेको छ। पहिलो विश्वकप गोलसँगै उनले विश्व फुटबलमा आफ्नो उज्यालो भविष्यको संकेत दिएका छन्। यामलको उत्कृष्ट प्रदर्शनले स्पेनलाई नयाँ ऊर्जा दिएको छ भने आगामी प्रतियोगितामा उनीमाथि थप अपेक्षा बढेको छ।