रोक्का गरिएको सम्पत्ति खाडी राष्ट्रलाई दिन खोजे कडा जवाफ दिने इरानको चेतावनी

जेष्ठ, २४ काठमाडौं । इरान ले आफ्नो रोक्का गरिएको सम्पत्ति खाडी राष्ट्रहरूको क्षतिपूर्तिका लागि प्रयोग गर्ने कुनै पनि प्रयास स्वीकार्य नहुने भन्दै अमेरिका लाई चेतावनी दिएको छ।

इरानका उपविदेशमन्त्री काजेम गरिबाबादी ले सामाजिक सञ्जालमार्फत प्रतिक्रिया दिँदै रोक्का गरिएको इरानी सम्पत्ति अमेरिकाका सहयोगी राष्ट्रहरूलाई वितरण गर्ने कोष नभएको बताएका छन्।

उनले इरानी सरकारको सहमतिविना सम्पत्ति जफत, हस्तान्तरण वा अन्य प्रयोजनमा प्रयोग गरिए त्यो अन्तर्राष्ट्रिय कानुनविपरीत हुने दाबी गरेका छन्। त्यस्तो कदम चालिए इरानले उचित प्रतिक्रिया दिने चेतावनी पनि उनले दिएका छन्।

गरिबाबादीले अमेरिकाले तेहरानसँग वार्ता र समझदारीको प्रयास गरिरहेको दाबी गरिरहेकै अवस्थामा यस्तो कदमले कूटनीतिक प्रक्रिया प्रभावित हुन सक्ने बताएका छन्। साथै, केही खाडी मुलुकहरूले आफ्नो भूमि र पूर्वाधार इरानविरुद्धको सैन्य कारबाहीका लागि उपलब्ध गराएकाले उनीहरूले क्षतिपूर्ति माग्ने आधार नरहेको र बरु इरानमाथि भएको आक्रमणको क्षतिपूर्ति दिनुपर्ने उनको तर्क छ।

यसअघि अमेरिका र इजरायल ले इरानमाथि सैन्य कारबाही सुरु गरेपछि इरानले साउदी अरेबिया, संयुक्त अरब इमिरेट्स, कुवेत र बहराइन लगायतका खाडी राष्ट्रतर्फ प्रहार गरेको थियो।

यसबीच, स्कट बेसेन्ट ले इरानी आक्रमणबाट प्रभावित खाडी राष्ट्रहरूको पुनर्निर्माण तथा क्षतिपूर्तिका लागि रोक्का गरिएको इरानी सम्पत्ति प्रयोग गर्ने सम्भावनाबारे विचार गरिरहेको भन्दै फाइनान्सियल टाइम्स ले सोमबार समाचार प्रकाशित गरेको छ।

अमेरिका तथा उसका साझेदार मुलुकहरूमा इरानको करिब १०० अर्ब अमेरिकी डलर बराबरको सम्पत्ति रोक्का रहेको अनुमान छ। हाल जारी कूटनीतिक वार्तामा उक्त सम्पत्तिको केही हिस्सा फुकुवा गर्ने विषय पनि छलफलमा रहेको बताइएको छ।

विश्लेषकहरूका अनुसार इरानले शान्ति सम्झौतामा सहमति जनाउन दबाब सिर्जना गर्ने उद्देश्यले अमेरिकाले रोक्का सम्पत्ति प्रयोगको विकल्प अघि सारेको हुन सक्ने आकलन गरिएको छ।