बोल्ने भन्दा काम गरेर देखाउने खेलकुदमन्त्री बब्लु गुप्ताको प्रतिवद्धता

काठमाडौं, ९ कार्तिक। नवनियुक्त युवा तथा खेलकुदमन्त्री बब्लु गुप्ताले आफू बोल्ने भन्दा पनि केही काम गरेर देखाउने पक्षमा रहेको बताएका छन् । उनले गफ गरेर समय खेर फाल्ने पक्षमा नरहेको प्रष्ट्याए ।

आइतबार अपरान्ह सिंहदरबारमा पुगेर पदभार ग्रहण गर्दै उनले आफू बोल्ने भन्दा पनि केही काम गरेर देखाउने पक्षमा रहेको बताएका हुन् । विगतमा मन्त्रीहरूले काम गर्ने भन्दा बोलेर बस्दा मुलुक बिग्रिएकाले आफूले काम गरेर मात्रै बोल्ने संकल्प लिएको मन्त्री गुप्ताको बताए ।

‘हामीलाई काम गर्न दिनुहोला । हामी के काम हुन्छ, त्यसलाई डेली प्रश्तुत गर्नेछौं,’ उनले भने, ‘बोलेर भन्दा पनि पहिला कामै गरेर देखाउँछु । मात्रै यो बोल्दो रहेछ भनेर भएन । बोलेर नै यो सबै कुरा बिग्रेको हो नि ।’

मन्त्रालयको टिमसँग बसेर छलफल गरेर मात्रै आफू अघि बढने समेत उनले बताए । उनले त्यसका लागि आफूलाई समय दिन पनि आग्रह गरेका छन् ।

‘पहिला हामी कामै गरौं । काम गरेपछि त्यो निर्णयहरू हामी तपाईहरूको अगाडि प्रश्तुत गर्ने नै छौँ । त्यसका लागि कृपया तपाईंहरूले हामीलाई पनि समय दिनुहोला,’ मन्त्री गुप्ताले भने, ‘किनभने हामीसँग सर्ट टाईम छ । रिसोर्सेस पनि थोरै नै छ । काम गर्नुपर्ने धेरै छ । डेलिभरी गर्नुपर्ने धेरै छ । त्यसो भएकाले हामी कामैतर्फ लाग्छौं ।’

मन्त्री गुप्तालाई मन्त्रालयका सचिव डा।हरिप्रसाद लम्साल लगायतका उच्च प्रदस्थ कर्मचारीहरूले स्वागत गरेका थिए । उनले पत्येक बैठकको प्रत्यक्ष प्रसारण गर्ने बताएका छन् । यसले गर्दा के काम भयौ भन्ने कुरा प्रत्यक्ष जनाताले थाहा पाउने उनको जिकिर छ ।