आँखुखोला जलविद्युतको खुद नाफामा वृद्धि

काठमाडौ, २८ माघ । आँखुखोला जलविद्युत कम्पनी लिमिटेडले आर्थिक वर्ष २०८१।८२ को दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ। सार्वजनिक वित्तिय विवरणअनुसार कम्पनीको खुद नाफा वृद्धि भएको छ। तर विद्युत उत्पादनमा कमी हुँदा आम्दानीमा गिरावट आएको छ ।

कम्पनीले चालु आवको दोस्रो त्रैमाससम्म १ करोड ८६ लाख रुपैयाँ खुद नाफा आर्जन गरेको छ, जुन अघिल्लो आवको सोही अवधिको तुलनामा २२.४९ प्रतिशतले वृद्धि भएको हो। अघिल्लो आवको यही अवधिसम्म कम्पनीले १ करोड ५२ लाख रुपैयाँ खुद नाफा कमाएको थियो।

तर, विद्युत बिक्री आम्दानीमा भने गिरावट देखिएको छ। कम्पनीले चालु त्रैमाससम्म ९ करोड २१ लाख रुपैयाँ मात्र आम्दानी गरेको छ, जुन अघिल्लो वर्षको तुलनामा १४.४० प्रतिशतले कम हो। यो विद्युतको बजार माग र बिक्री रणनीतिमा कम्पनीले सुधार गर्नुपर्ने संकेत दिन्छ।

विद्युत बिक्री आम्दानी घटे पनि अन्य आम्दानी भने उल्लेखनीय रूपमा बढेको छ। अघिल्लो आवको दोस्रो त्रैमाससम्म ११ लाख ४० हजार रुपैयाँ मात्र रहेको अन्य आम्दानी यो वर्ष ९९ लाख ४५ हजार रुपैयाँ पुगेको छ। साथै, कम्पनीले वित्त आम्दानीबाट २८ लाख ८२ हजार रुपैयाँ आर्जन गर्न सफल भएको छ।

कम्पनीको कुल चालु सम्पत्ति ८३ करोड ५० लाख रुपैयाँ रहेको छ भने कुल चालु दायित्व १४ करोड ४१ लाख रुपैयाँ रहेको छ।

कम्पनीको प्रतिशेयर आम्दानी: १.८७ रुपैयाँ, प्रतिशेयर नेटवर्थः ८९ रुपैयाँ, मूल्य आम्दानी अनुपात: १०५ गुणा र तरलता अनुपात: ५.७९ प्रतिशत रहेको छ ।