मोफसलकै दुई चर्चित फुटबल प्रतियोगिताः २४ औं आहा रारा पोखरा गोल्डकप र २५ औं बुढासुब्बा गोल्डकप फुटबल धरानमा जारी

काठमाडौं, २४ माघ । हाल मोफसलकै दुई चर्चित फुटबल प्रतियोगिता २४ औं आहा रारा पोखरा गोल्डकप र २५ औं बुढासुब्बा गोल्डकप फुटबल चलिरहेको छ । आहारारा पोखरा गोल्डकप पोखरामा र बुढासुब्बा धरानमा जारी छ ।

संयोग के छ भने एनआरटीले दुवै प्रतियोगितामा आज एकैदिन प्रतिस्पर्धा गर्दैछ । तर, दुई फरक टिम बनाएर । पोखरामा अन्जन विष्टको कप्तानीमा र धरानमा सरोज तामाङको कप्तानीमा एनआरटी मैदान उत्रँदैछ ।

यस्तै ए डिभिजन लिग विजेता चर्च ब्वाइजले पनि दुवैतिर दुई टिम बनाएर खेलिरहेको छ ।

आहा रारा पोखरा गोल्डकपमा एनआरटीले आज ए डिभिजन लिग विजेता चर्च ब्वाइज युनाइटेडसँग खेल्दैछ । खेल दिउँसो २ः३० बजे पोखरा रंगशालामा हुनेछ ।

चर्च ब्वाइजले बुधबार भुटानी क्लब आरटिसीलाई अराएर बुढासुब्बाको फाइनल पुगिसकेको छ ।

यस्तै एनआरटीले आजै बुढासुब्बा गोल्डकपमा सेमिफाइनल खेल्दैछ । एनआरटीले बुढासुब्बाको दोस्रो सेमिफाइनलमा युनाइटेड खर्साङ एफसीसँग खेल्नेछ । यस सिजन लगभग सबै जसो गोल्डकपहरुमा प्रतिस्पर्धा गरिरहेको चर्च ब्वाइज र एनआरटीले दुई चर्चित फुटबल प्रतियोगिताको साय जुध्दा पनि दुवैतिर सहभागी भएको हो ।

मंसिर यता चर्च ब्वाइजले ४ वटा नकआउट प्रतियोगिताको फाइनल खेल्दा दुई फाइनल एनआरटीविरुद्ध नै थियो । जसमा दुवैले एक(एक फाइनल जितेका थिए । चर्च ब्वाईजले झापा कप र फाल्गुनन्द गोल्डकपको उपाधि जित्दा इलाम गोल्डकप र सिक्किमका गभर्नस गोल्डकपमा भने उपविजेता बनेको थियो ।

एनआरटीले इलाम गोल्डकपको फाइनलमा चर्च ब्वाइजलाई ३–० ले हराएर उपाधि जितेको थियो भने झापा कपको फाइनलमा चर्च ब्वाइजले एनआरटीलाई ३–१ ले हराएर उपाधि जितेको थियो । चर्च ब्वाइजले पाँचौं फाइनलको रुपमा शनिवार बुढासुब्बा गोल्डकपको फाइनल खेल्नेछ ।

चर्च ब्वाइज र एनआरटीले केही दिन अघि काठमाडौंमा भएको प्रथम सभापति कपमा पनि प्रतिस्पर्धा गरेको थियो । जहाँ एनआटीले सोमिफाइनलसम्मको यात्रा तय गर्दा चर्च ब्वाईज पहिलो खेलमै पराजित भएको थियो ।