जय ट्रफीको उपाधिका लागि दुई विभागिय टिम पुलिस र आर्मी भिड्दै

काठमाडौं,१ माघ । जय ट्रफी पुरुष एलिट कप क्रिकेट प्रतियोगिताको उपाधि भिडन्त मंगलबारदेखि सुरु हुँदैछ । तीन दिवसीय फरम्याटमा हुने फाइनल खेलमा नेपाल पुलिस क्लब र त्रिभुवन आर्मी क्लब भिड्दै छन्।

वीरगन्जको नारायणी क्रिकेट रंगशालामा दुई विभागीय टिमको बीच उपाधिका भिडन्त हुनेछ । अहिलेसम्म मौसम सफा नभएका खेल निर्धारित समयभन्दा केही ढिला सुरु हुनेछ देखिछ ।

मौसममा सुधार आएसंगै दुई टिमबीचको खेल सुरु हुनेछ । समूह चरणको खेलमा शिर्ष दुई स्थानमा रहेका पुलिस र आर्मी प्रतियोगिताको फाइनल खेल्न लागेका हुन्। समूह चरणमा समान तीन खेलमा पुलिसले ६६ र आर्मीले ५५ अंक बटुलेको थियो ।

प्रतियोगितामा सहभागी अन्य टोलीमध्ये तेस्रो स्थानमा रहेको बागमतीले ४१.५ र पुछारमा रहेको मधेस प्रदेशले ३१ अंक पाएको थियो । समूह चरणको खेलमा पुलिसले दुई खेल जितेको थियो भने एकमा बराबरी भएको थियो । आर्मीले भने एकमा जित हात पारेको थियो भने दुई खेल बराबरीमा टुंग्याएको थियो ।

समूह चरणको पहिलो खेलमा आर्मीसंग बराबरी खेलेको पुलिसले दोस्रो खेलमा मधेसलाई एक इनिङ र ३५ रन पराजित गरेको थियो भने तेस्रो खेलमा बागमतीमाथि पाँच विकेटको जित हात पारेको थियो। आर्मीले भने पहिलो खेलमा पुलिस र दोस्रो खेलमा बागमतीसंग बराबरी खेल्दै तेस्रो खेलमा मधेसलाई आठ विकेटले हराएको थियो ।

२०८० माघमा सम्पन्न प्रधानमन्त्री कप क्रिकेट प्रतियोगिताको शिर्ष चारमा रहेका चार टोलीले जय ट्रफी एलिट कपमा सहभागिता जनाएका थिए। प्रधानमन्त्री कपको फाइनलमा पुलिसले आर्मीलाई ६ विकेटले पराजित गर्दै उपाधि जितेको थियो ।