आर्थिक क्रियाकलापमा नयाँ संकट देखा पर्ने

काठमाडौँ । दक्षिण एशियामा नव–उदारवादी अर्थ व्यवस्थाको प्रभाव बढदै गएकाले आर्थिक क्रियाकलापमा नयाँ संकट देखा परेकामा दक्षिण एशियाली माक्र्सवाद अनुसन्धान संगठनले चिन्ता व्यक्त गरेको छन् ।

यहाँ आज आयोजित कार्यक्रममा विश्वका बामपन्थी कम्युनिष्ट आन्दोलनका अगुवाले उदारवादको संशोशित रुप नवउदारवाद भएको बताउँदै यसले निजी व्यवसाय, उद्यमलाई प्राथमिकता दिने हुँदा सामाजिक सहयोग तथा मूल्य मान्यतामा कमी आउने बताएका हुन् ।

अखिल नेपाल किसान महासंघका अध्यक्ष बलराम बाँस्कोटाले नवउदारवादमा आर्थिक उदारीकरण, विश्वव्यापीकरण, निजीकरण, अर्थतन्त्र र समाजमा नीजी क्षेत्रको भूमिका बढाउन सरकारी खर्च कटौती, स्वतन्त्र बजार र खुला अर्थतन्त्रको अवधारणाको विकास भएको बताउँदै यस अर्थ व्यवस्थाले सामाजिक तथा सांस्कृतिक मान्यता न्यूनीकरण गर्ने चुनौति औल्याउँनुभयो ।

नेकपा (एकीकृत समाजवादी) बागमती प्रदेश इन्चार्ज सावित्रा भुसालले नवउदारवादको प्रयोगले उत्पादनका साधन र स्रोतमा राज्यको नियन्त्रण खुम्चने हुँदा खुला बजार, निजीकरणका रुपमा उद्यमीले बजारमा नियन्त्रण गर्ने र सरकारले आवश्यक हस्तक्षेप गर्न नसक्ने समस्या रहेको बताउनुभयो ।

किसान अगुवा प्रमेश पोखरेलले उत्पादनका सबै क्षेत्रमा नवउदारवादीले प्रभाव
पार्ने भए पनि कृषि क्षेत्रमा गरिने नयाँ बिउ विजनका प्रयोगले मौलिक उत्पादन
लोपोन्मुख भई सामाजिक पहिचानमा पनि हस आउने खतरा रहेको प्रष्ट पार्नुभयो ।

भारतका सुजना पुडापाटी, पाकिस्तानका तेमुर रहमान, वंगलादेश वर्कर पार्टीका समसिर, दक्षिण अफ्रिकाका बास्ना पिथौसका साथै संयुक्त राज्य अमेरिकाका प्रतिनिधिले यस्तो अर्थ प्रणालीमा पूँजीलाई स्वतन्त्र आवतजावत गर्न निजीक्षेत्रले स्वतन्त्र व्यापार को समर्थन गर्ने, आर्थिक लाभ कायम गर्ने भएकाले राष्ट्रिय पूँजी सञ्चयमा संकट आउने धारणा राख्नुभयो ।

आर्थिक उदारीकरण र लोककल्याणकारी राज्यमा भएका आर्थिक सुधारका साथै आर्थिक तथाराजनैतिक स्वतन्त्रतामा एकरुपता नहुने विज्ञहरुको सुझाव थियो । कृष्णराज