नोबेल मेडिकल कलेज टिचिङ्ग हस्पिटलले विश्वमै दुर्लभ र जटिल शल्यक्रिया सफलतापूर्वक सम्पन ग¥यो ।

काठमाडौँ । बिराटनगर स्थित नोबेल मेडिकल कलेज टिचिङ्ग हस्पिटलले विश्वमै दुर्लभ र जटिल मानिने शल्यक्रिया सफलतापूर्वक गरेको छ । सुनसरीको इनरुवा–३ महेन्द्र चौकका ४२ बर्षीय हिरा आचार्यको दुई जटिल रोगको एकैसाथ सफल शल्यक्रिया गरिएको हो ।

आचार्यको एन्यूरिजम (मस्तिष्क भित्रको नसामा बनेको रगतको पोका फुटेको) र ब्रेन ट्यूमरको एकैसाथ सफल शल्यक्रिया गरिएको नोबेल अस्पतालले जनाएको छ । यस्तो शल्यक्रिया विश्वमै दुर्लभ र जटिल मानिने चिकित्सकहरुको भनाई छ । अत्याधुनिक न्यूरो सर्जरी सेवा सुरु गरेको नोबेलले ईन्ट्राअपरेटिभ एम आर आई र आई सेभेन नेभिगेशन जस्ता उपकरणको सहायतामा दुवै रोगको एकैसाथ सफल शल्यक्रिया गरेर बिरामीको ज्यान बचाएको हो ।

प्रोफेसर जुहा एन्टेरो हर्नेशनेमी, डा.आईपी चेरियन, प्रकाश काफ्ले, सुनिल मुनाकोमी, भ्लादिमिरोभिज सर्गे, फिट्री सुमार्दी, दिपक पौडेल, बिजय केसी लगायत चिकित्सकहरुले दुर्लभ र जटिल शल्यक्रियालाई सफल बनाएका हुन् । एन्यूरिजमको समस्याले मात्र पनि विरामीको ज्यान जाने संभावना धेरै हुन्छ । अझ ब्रेन ट्यूमर भित्र भएको एन्यूरिजम झनै खतरनाक भएपनि शल्यक्रिया गरी बिरामीको ज्यान बचाउँन सफल भएको डा. चेरियनले बताए ।

न्यूरोका लागि जर्मन, अमेरिकालगायत देशबाट अत्याधुनिक उपकरण र सिएमसी भेलोर, फिनल्याण्ड, रसिया, इन्डोनेसिया, लगायत देशबाट बिषेशज्ञ चिकित्सक ल्याएर नोबेलले जटिल रोगको सफल शल्यक्रिया गर्दै आएको छ ।

दक्षिण एशियामै पहिलो पटक अत्याधुनिक न्यूरो सर्जरी सेवा सुरु गरेको दावी गर्दै डा.शर्माले भने ‘नेपालका मात्र हैन विदेशका बिरामी पनि उपचारका लागि नोबेलमा आउँने वातावरण बनाएका छौ ।’ गुणस्तरीय उपचार सेवा पाएपछि नोबेल अस्पतालमा आउँने बिरामीको संख्या पनि बढ्दै गएको छ ।