भारतमा पनि देखियो नयाँ स्वरूपको कोरोना !

काठमाडौँ , पुस १४ । कोरोना भाइरसले आक्रान्त परेको विश्वमा फेरि अर्को प्रजातिको कोरोना भेटिएको छ । यसरी एउटा भाइसको अन्त्य नहुँदै अर्को फेरि भेट्दिा पीडामाथि झन पीडा थएिको भन्दा फरक नपर्ला । उता बेलायतमा नयाँ प्रकारको भाइरस भेटिएको छ ।

बेलायतबाट नेपाल आएका ५ जनामा पुष्टि भइसकेको छ । यता भारतमा पनि कोरोना भाइरसको नयाँ प्रकार भेटिएको छ । भारतको स्वास्थ्य तथा परिवार कल्याण मन्त्रालयले बेलायतबाट फर्किएका ६ जनामा कोरोना भाइरस देखिएको पुष्टि गरेको हो ।

बेलायतबाट देखिएको नयाँ प्रकारको कोरोना भाइरसका संक्रमित बेंगलोर, हैदराबाद, पुनेमा देखिएका हुन् । संक्रमित सबैलाई आइसोलेसनमा निगरानीमा राखिएको छ साथै संक्रमितको सम्पर्कमा आएकाको कन्ट्याक्ट ट्रेसिङ अघि बढाइएको अधिकारीहरुले बताएका छन् । मन्त्रालयका अनुसार पोजिटिभ स्याम्पललाई जिनोम सिक्वेन्सिङका लागि प्रयोगशालामा पठाइएको छ ।

पछिल्लो महिनामा मात्रै बेलायतबाट ३३ हजार यात्रु भारत फर्किएका छन् । तीमध्ये १ सय १४ जनालाई कोरोना संक्रमण पुष्टि भएको छ । ती सबैलाई नयाँ प्रकारको कोरोना देखिएको भने होइन । भारतले बेलायतबाट आउने सबै उडानमाथि प्रतिबन्ध लगाएको छ ।

बेलायतमा सेप्टेम्बरमा देखिएको यो भाइरस डेनमार्क, नेदल्यान्ड्स, अस्ट्रेलिया, इटाली, स्विडेन, स्विजरल्यान्ड, जर्मनी, क्यानडा, जापान, लेबनान, सिंगापुर, दक्षिण कोरियालगायतका विश्वका अधिकांश देशमा पुगिसकेको छ ।

बेलायतमा भएको अध्ययनहरूले नयाँ कोरोना भाइरस पहिले देखिएको भाइरसभन्दा ७० प्रतिशतभन्दा बढी छिटो सर्ने देखाएको छ । छिटो सर्ने भए पनि बिरामीको मृत्यु हुने दर बढी छ या छैन भन्ने अझै खुल्न सकेको छैन । साथै पहिलेको कोरोना भाइरसका लागि तयार भएको भ्याक्सिनले पनि काम गर्छ कि गर्दैन भन्ने अध्ययन हुनै बाँकी छ ।