जुम्लाको एउटा ३ तले घरमा भीषण आगलागी ,यस्तो छ अवस्था

काठमाडौं, मंसिर ८ । जुम्लाको कालेखोलीमा रहेको एउटा ३ तले घरमा भीषण आगलागी भएको छ ।

आइतबार मध्याह्न १२ बजेतिर आगलागी सुरु भएको र दमकल जाने बाटो नभएकाले पुरै घर जलेर नष्ट भएको छ ।

जलेको घर जुम्लाको चन्दननाथ नगरपालिका(२ का गोविन्द भण्डारीको भएको स्थानीय कर्ण भण्डारीले जानकारी दिए ।

आगलागी भइरहेको घरको अर्को तर्फबाट डोजरले बाटो बनाएर भर्खरै दमकल पुगेको छ भने नेपाली सेना, नेपाल प्रहरी र स्थानीय मिलेर उद्धार गरिरहेका छन् । आगलागी नियन्त्रणमा लिने काम भइरहेको जिल्ला प्रहरी कार्यालयले जानकारी दिएको छ ।

मानवीय क्षति भएको जानकारी नभए पनि घरमा भएका सामानहरु सम्पूर्णरुपमा जलेर नष्ट भएका छन् । घरधनी जिल्लाबाहिर भएकाले क्षति विवरण आउन केही समय लाग्ने देखिन्छ ।