प्रचण्डलाई भेट्न मोहनविक्रम सिंह बिहानै किन पुगे खुमलटार?
काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा (मसाल) का महामन्त्री मोहनविक्रम सिंहबीच भेट भएको छ।
अध्यक्ष प्रचण्डलाई भेट्न महामन्त्री सिंह बिहीबार बिहान ७:३० बजे प्रचण्ड निवास खुमलटार पुगेका थिए। सो क्रममा वाम गठबन्धनलाई कायमै राखेर अगाडि बढ्नेबारे कुराकानी भएको थियो।
भेटमा नेता सिंहले वामपन्थीहरु मिलेर अघि बढ्दा मात्रै मुलुकमा राजनीतिक स्थिरता र विकास सुनिश्चित हुने कुरामा जोड दिएको प्रचण्डको निजी सचिवालयले जनाएको छ।
भेटका क्रममा अध्यक्ष प्रचण्डले प्रतिनिधिसभा र प्रदेशसभा निर्वाचनमा वामपन्थीहरु मिल्दा राम्रो नतिजा आएको र देशमा सकारात्मक सन्देश गएको बताउँदै राष्ट्रियसभा निर्वाचनमा पनि एमाले, माओवादी केन्द्र र मसालबीचको चुनावी तालमेललाई कायमै राखिने बाताएका थिए।
भेटमा दुवै नेताहरु राष्ट्रियसभा निर्वाचनमा साझा उम्मेद्वार खडा गर्दै वामपन्थी एकता र तालमेललाई बलियो बनाएर अगाडि बढ्न सहमत भएका छन्।
तर एमाले अध्यक्ष केपी शर्मा ओली उपचारका लागि भन्दै बैंकक रहेका बेलामा प्रचण्ड र मोहनविक्रमबीचको भेटलाई भने अर्थपुर्ण रुपले हेरिएको छ ।
प्रतिक्रिया दिनुहोस्